Tarnimikkut napparsimasunut nalunaarusiaq saqqummiunneqarpoq
Naalakkersuisut 2003-mi aalajangerput tarnimikkut napparsimasut eqqartuussaanermikkut katsorsagassanngorsimasut naammassillugillu katsorsarneqarsimasut tigoorarneqarnerannut atatillugu, nunatsinni oqartussaasut pisussaaffiisa aaqqiivigineqarnissaannut pillugu suleqatigiissitaliortoqassasoq.
Pisoq aallartippoq kalaallit tarnimikkut napparsimasut eqqartuussaanermikkut Danmarkimi katsorsagassanngorsimasut naammassillugillu katsorsarneqarsimasut, kalaallit oqartussaasuinit tiguneqarsinnaannginneri pissutigalugit
Amtip napparsimavissuaniit angerlartinneqarsinnaannginnerat Folketingip Ombudsmandiata nalunaarusiaani 1996-imeersumit naammagittaalliutigineqarmat.
Kingorna Inatsisartut Ombudsmandia misissuinermini nalunaarusialiornermilu nalilerpaa, inatsisitigut tunngavigisamik aaqqissuussaasumik tarnimikkut napparsimasut eqqartuussaanermikkut Danmarkimi katsorsagassanngorsimasut angerlartinneqarsinnaassappata paaqqinniffeqarnikkut allatigullu katsorsaanikkut ikiorsiinikkullu Namminersornerullutik Oqartussat kommunillu pisussaaffeqarnerannik allaaserinnittumik piusoqanngitsoq.
Naalakkersuisullu 2003-mi aalajangerput napparsimasut pillugit suleqatigiissitaliortoqassasoq, tarnimikkut napparsimasut tarnimikkut nappaatilittut eqqartuussaasumanertik pissutigalugu Danmarkimi katsorsarneqartussanngortitaasimasut naammassillugit katsorsarneqarsimasut tigoorarneqarnerannut atatillugu nunatsinni oqartussaasut pisussaaffiisa aaqqiivigineqarnissaannut siunnersuusiornissaq.
Nalunaarusiallu makku siunnersuutigai kaammattuutigalugillu: Najoqqutassialiortoqassasoq, allaaserisaq mappersaganngorlugu saqqummersinneqarluni, napparsimasunik/sullitanik tarnimikkut napparsimasunik eqqartuunneqarsimasunik sullissisut atugassaannik, Sungiusarfik Aaqami sulisut amerlassusissaat Aaqami najugaqartut amerlassusaannut oqimaassusaannullu naleqqussarneqassasoq, annertuumik innarluutilinnik ikiorsiisarneq pillugu Inatsisartut peqqussutaata allannguutissatut siunnersuut suliarineqassasoq, tapersersortitut ikiortinik pikkorissartitsinermik ingerlatsineq siuarsarneqassasoq, tarnimikkut napparsimasunik eqqartuunneqarsimasunik/sullitanik sullissisunut sapaatip akunnerani ataatsimi pikkorissartitsineq siuarsarneqassasoq, tapersersortinik ikiorteqartitsinermik ataqatigiissaarisartunut siunnersuisarnermik ilinniaqqitsitsineq siuarsarneqassasoq, kiisalu tarnimikkut napparsimasunut eqqartuunneqarsimasunut suliffissaqartitsiniarnermi suliniutit amerlanerusut pilersinneqarsinnaanersut naliliisoqassasoq.
Nalunaarusiaq Naalakkersuisunit tusaatissatut tiguneqarpoq. Ilaqutariinnermut naalakkersuisoqarfiup suleqatigiissitat kaammattuutaat siunnersuutaallu suliareqqissavai, ilanngullugu kaammattuutit siunnersuutillu aningaasatigut malitseqartussat qanoq ilillugit aningaasalersorneqarsinnaanersut aamma misissussallugu.
