Tarnimikkut nappaatillit pisinnaatitaaffii pitsanngorsarniarpaat

Tarnimigut nappaatilik pinngitsaaliissummik napparsimavimmut unitsinneqartoq eqqiluisaanngippat pinngitsaalillugu uffarneqarsinnaalissaaq, imaluunniit naak napparsimavimmiit angerlareersimagaluarluni pinngitsaaliissummik nakorsaatitortinneqarsinnaalissaaq.

Tamakkuupput tarnimikkut nappaatillit siumorsinnaasaat, pingasunngorneq oktobarip pingajuanni siullermeerlugu inatsisissatut siunnersuut ’ Tarnimikkut nappaatilinnik kiffaanngissusiiaasarneq allatullu pinngitsaaliisarneq pillugit Inatsisartut inatsisaat’ oqaluuserineqartussaq akuerineqassappat.

- Tarnimikkut nappaatillit inuttut eqqiluisaarnissaminnik soorlu errorsinermik assigisaannillu isumaginnissinnaanngitsut, inatsisitigut tunngavissiinikkut inuttut eqqiluisaarnissaasa pinngitsaaliissutaasinnaanissaa siunnersuutaavoq, taama inatsisissatut siunnersuummut nassuiaammi allaqqavoq.

Inatsisissatut siunnersuut Nunatsinni pinngitsaaliissummik napparsimavimmut unitsinneqartut ilaatigut pisinnaatitaaffiisa illersorneqarnissaat siunertaralugu suliaavoq, saniatigut Dronning Ingridip Napparsimavissuani tarnimikkut nappaatilinnut immikkoortortaqarfimmi qanoq suleriuseqartoqarsinnaassanersoq inatsisissami allaqqavoq.

- Maannamut pinngitsaaliissummik napparsimavimmut unitsinneqartartut tigummigallagassanngortitaasartullu ukiumut 50-it 70-illu akornanniipput ukiullu kingulliit pingasut ingerlanerini pinngitsaaliissummik aalaakkikkat 70-it 100-illu missaanniittut nalunaarsorsimapput, taama inatsisissatut siunnersuummut nassuiaammi allaqqavoq.

Pinngitsaaliissummik nakorsaatitortinneqarneq
Inatsisissamut siunnersuut ammaassivoq naak inuk pinngitsaaliissummik napparsimavimmut unitsinneqarsimalluni angerlareersimagaluartoq pinngitsaaliissummik nakorsaatitaanissaanut.

- Pingaartumik anigugassaanngitsumik skitzofrenimik nappaatillit pinngitsooratik katsorsartinnissamik ingerlatsiinnarnissaasa ajornakusoorsinnaanera, tarnimikkut nappaatilinnik katsorsaanermi misilittakkat takutippaat. Napparsimasut ilaat – katsorsarluarneqareerlutik napparsimavimmmiit angerlartitat nakorsaatitukkaminnik unitsitsisarput. Tamatuma kingunerisaanik nappaataat ajorsisarpoq ilaatigullu pinngitsaaliissummik napparsimavimmut unitseqqinneqartariaqartarlutik, inatsisissatut siunnersuummut nassuiaammi allaqqavoq.

Tarnimigut napparsimalluni katsorsartittoq piffissaq eqqorlugu napparsimavimmut nakorsaatitoriartorluni takkutinngippat, taava politiinit aaneqarluni ulloq ataaseq pinngitsaaliissummik napparsimavimmut unitsinneqarsinnaanera ammaanneqassaaq.

Tarnimikkut napparsimasut eqqunngitsumik pineqartutut misigisimagunik, inatsisissatut siunnersuut maalaaruteqarsinnaanermut aalajangersakkanik nutaanik, maalaaruteqartut pitsaanerusumik sullinneqarsinnaanerannik siunnerfilimmik imaqarpoq. Maalaaruteqarnermiit ullut arfineq marlut ingerlaneranni inerniliisoqartassalluni.

Sukkanerusumik unitsitsisarneq
Inatsisissatut siunnersuummi tarnimikkut napparsimasut pinngitsaaliissummik napparsimavimmut unitsinneqarnialeraangata ilaatigut sapaatip akunneri arlaqartut utaqqisariaqartarneri siunissami allanngortinniarneqarpoq.

Taamaattoq Nunatsinni angalaniarneq aamma ajornakusoorsinnaasarnera eqqarsaatigineqarluni.

- Pinngitsaaliilluni napparsimavimmut unitsitsinermi angallannikkut periarfissat akornusiinngippata akunnerit 48-it qaangiutsinnagit Dronning Ingridip Napparsimavissuanut nuussisoqartassasoq siunniunneqarpoq. Taamaasilluni piffissaq killiliussaq qaangerneqaraluartoq, napparsimasup peqqissusaa apeqqutaatillugu, angallassineq immikkut ittumik pinasuartumik pissanngilaq, taama inatsisissatut siunnersuummut nassuiaammi allaqqavoq.

http://www.inatsisartut.gl/dvd/EM2012/pdf/media/571469/pkt128_em2012_fri...