Tarnimikkut innarluutillit atuarunnaartilerpai
Tarnimikkut innarluutillit tallimat Ilulissani Specialcenterimi atuarsinnaajunnaalerput, Namminersornerullutik Oqartussat isumaqaramik ukiuni qulini atuareeramik atuaqqissanngitsut.
Sungiusarfik Ikinngummi pisortamut tullersorti Sara Dalager oqarpoq uggornartoq inisimasumik atuarunnaarnissaat. Tarnimikkummi innarluutillit taakkua annertuumik siuariarsimammata piginnaasamikkut Specialcenterimiinnermi nalaanni.
Meeqqat tamarmik atuartinneqarnissaannut pisussaaffitsik atuarfiit isumannaarsimanngilaat. Viggo Johansenikut paniat 17liilerluni atuarunnaartitaavoq, ilaatigut nukappiaqqat sakkortuumik pissusillit akornganni atuartitaareersimalluni. Tamatuma kingorna angerlarsimaannartitaasimavoq. 18nik ukioqalersorlu Ilulissani Specialcenterimut inissinneqarsimavoq, tassanilu kiisalu ilaqutariit atuarfik pisariaqartitartik amigaatigiuarsimasartillu nassaaraat. Paniallu siuariarsimaqaaq.
Atuartut atuarnertik nuannaringaaramikku sapaatip akunnerata naanerani angerlarsimanertik sivisugisarpaat, sapaatikkulli ataasinngornerunissaa qilanaarilertarlugu, piginnaaneqarnerulerlutik misigisaramikku. Sara Dalager oqarpoq.
Specialcenterimi aqutsisoq Arnaruluk Pedersen oqarpoq kiisami ilinniartitsisut immikkut annertusisamik atuartitsinissaminnut ilinniarsimasut sisamat atorfinitsinneqarnissaminnut utaqqigaluartut soriarsinnaannanili. Naalakkersuisut siulittaasuat Hans Enoksen qanittukkut Specialcenterimut pulaarpoq atuarfiullu ingerlaasaa nuannarilluinnarlugu oqaatigisimallugu.
