Tarnimikkut eqqarsartaatsimikkullu nappaatillit ulluat ullumikkut malunnartinneqarpoq.
- Tarnimikkut eqqarsartaatsimikkullu nappaatillit, aamma nappaatit taakkuusut ulluinnarni eqqartorpiarneq ajoratsigit, paqumigalugillu pisaratsigit, taamaammat taamaattumik ulloqartitsinissarput pisariaqartipparput. Esekias Therkelsen Tarnimikkut eqqarsartaatsimikkullu napparsimasut ilaqutaasalu peqatigiiffiat, Sugisaq sinnerlugu taama oqarpoq.
Ullumikkut inuit 190-it missaanniittut nappaammik skizofrenimik taaneqartartumik nappaateqarput, saniatigullu inuit 500-t sinnillit tarnimikkut eqqarsartaatsimikkullu nappaateqarlutik inooqataapput, Innarluutit Pillugit Ilisimasaqarfik Siunnersuisarfiutigisoq IPIS taama ilisimatitsivoq.
- Inunnut taamatut nappaatilinnut sullissineq annertuvoq, unali uparuagassaavoq nakorsanik peqqissaasunik inunnillu ikiuisartunik isumaginnittunik ilinniarsimasunik amigaateqarneq malunnartorujussuummat, Esekias Therkelsen oqarpoq.
Nunatsinni tarnimikkut nappaatillit ullutsinni sammineqanngippallaartut, iliuuseqarfiginiarneqanngippallaartullu Esekias Therkeldsen isumaqarpoq.
- Suliniutit qaquguluunniit naammattutut oqaatigineqarsinnaanngillat, annertoorujussuarmik pisariaqartitsisuupput, taamaattumik suliniuteqartoqartariaqarpoq pisortaniit, peqqinnissaqarfimmiit, inuinnaat uagullu peqatigiiffitsinninngaanniit suliniuteqartuartarpugut, oqartoqarsinnaanngilarli suliniutit naammaginarsiumaartut, Esekias Therkelsen naggasiivoq.
Isumaginninnermut Naalakkersuisoq Maliina Abelsen Peqqinnissamullu Naalakkersuisoq Agathe Fontain Nuup Katersortarfiani ullumi ammaallutik oqalugiarput. Tarnimikkut eqqarsartaatsimikkullu napparsimasunik sullissisut allallu tapersersuisut, ukiup ingerlanerani suliarisartakkaminnik saqqummiussillutillu paasissutissiipput.