Tarnikkut peqqissuunissaq issittoq pillugu ataatsimeersuarnermi oqaluuserineqarpoq

Tarnikkut peqqissuunissaq issittumi pissutsit pillugit ataatsimeersuarnermi Arctic Circlemi Reykjavikkimi ingerlanneqartumi ullumi oqaluuserineqarpoq.
Peqqissutsimut Naalakersuisoq Doris Jakobsen Reykjavikkimi ataatsimeersuarnermi Arctic Cirlemi saqqummiussivoq Assi © : Arctic Circle
oktobarip 09-at 2016 18:45

Imminut toquttarnerup pinaveersaartinneqarnissaa oqaluuserineqarpoq, imminut toquttarnerup Kalaallit Nunaanni ajornartorsiutaanerujussua saqqummiunneqarluni. 

Ataatsimeersuarnermi oqalugiartut ilagaat Peqqissutsimut Naalakkersuisoq Doris Jakobsen, taassuma Kalaallit Nunaanni imminut toquttarnerup pinaveersaartinneqarneranut suliuniut oqaluttuaraa.

Suliniut 2013-mi aalajangiiffigineqarpoq taannalu 2019-ip tungaanut atuutissaaq, ilaatigut atuarfinni ajornartorsiortoqartillugu piareersimatitsisarneq aamma imminut toqunnissaminnut ilimanaateqartunut qanigisaasunullu pitsaanerusumik ikiuussinnaaneq pineqarlutik. 

Imminut toquttarnerup pinaaveersaartinneqartarneranut suliniutit Issittumi Siunnersuisoqatigiit ilisaritinneqarneranut ilaatinneqarput. 
Issittumi Siunnersuisoqatigiinni Arktisk Rådimi suliniut Rising Sun -  seqerngup nuilerneranik nutseqarsinnaasoq ataatsimeersuarnermi saqqummiunneqarpoq, suliniummi tassani nunap inoqqaavisa akornanni imminut toquttarnerup pinaveersaartinneqarnissaanut suliniut saqqummiunneqarpoq.

Imminut toquttarnerup pinaveersaartinneqarnissaanut suliniummi Rising Sun-imi suleqataasut ilaatigut tassapput Inuit Issittormiut Siunnersuisoqatigiiffiat ICC. 

Imminut toquttarneq kisiat oqaluuserineqanngilaq. 

Tarnikkut nappaatit issittumi nalinginnaasumik atugaasut aamma oqaluuserineqarput. Nunap inoqqaavisa ataqatigiinnerisa pingaaruteqassusia aamma oqaluuserineqarpoq. 

Nunap inoqqaavisa tarnikkut peqqissuunissaannut nagguteqatigiit inuit oqaasiisa nukittuujunissaat pingaaruteqartoq, Nunavummi ministeriunerup tullia Monica Ell-Kanyuk ataatsimeersuarnermi ilaatigut oqarpoq.

Nakorsap aamma Ilisimatusarfimmi ilisimatuutut sulisup Gert Mulvadip tarnikkut peqqissuunissamut ilaqutariit pingaaruteqassusiat erseqqissaatigaa.