Tarnikkut misissuinerup inernera: Toqutsisimasutut unnerluussaq pillarneqarnissaminut naleqquppoq
Angutip 26-nik ukiullip siorna juunimi blok 17-imi toqutaaneranut atatillugu angutit unnerluutigineqartut marluk tarnikkut mississuiffigineqarnerannit nalunaarusiat unnerluussisup ullaap tungaa saqqummiuppai.
Angut toqutsisimasut unnerluussaasoq pineqaatissinneqaruni Danmarkimi tarnimikkut nappaateqartut katsorsarfiannut Riskovimiittumut inissinneqarnissaa nallilerneqarpoq parnaarussaaneranit anisinneqarpat avatangiisiminut ulorianartorsiortitsisinnaammat.
Angutit pingasut eqqartuunneqarnerat ullaap tungaani nanginneqarmat, angutip toqutsisimasutut unnerluussaasup aamma angutip 19-inik ukiullip tarnikkut misissuiffigineqarnerannit nalunaarusiat saqqumiunneqarput.
Toqutsisimasutut unnerluussaasup 20-nik ukiullip tarnikkut misissuiffigineqarnera Århusip Universitetshospitaliani Riskovimiittumi tarnimikkut nappaateqartut immikkoortortaqarfiani pivoq.
Tassani nakorsaanerup aamma immikkut ittumik tarnip nappaataannik nakorsamit innersuussutigineqarpoq, angut 20-nik ukiulik tarnimikkut nappaateqartut katsorsartarfiannut Riskovimiittumut katsorsarneqarnissamik pineqaatissinneqassaasoq.
Angutip 20-nik ukiullip toqutsisimasutut unnerluussaasup misissuinermi saqqummiunneqartut malillugit, eqqarsaartaatsimigut pissusilersortarnermigullu niaqulaartutut nalilerneqanngilaq, taamaakkaluartoq Danmarkimi tarnimikkut nappaateqartut katsorsaaviannut inissinneqassasoq innersuussutigineqarpoq tamannalu pissaaq toqutsinermut pineqaatissiisoqarpat.
Tarnikkut misissuiffigineqarnerani tarnimigut innarluuteqarnera malunnartorsiffigineqanngilaq allatulluunniit innarluuteqarneranik.
Taamaakkaluartoq toqutsisutut unnerluussaasoq, avatangiisiminut ulorianartutut, ammip qalipaataanik immikkoortitsisartutut, saassussiumatuutut, soqutigittaatsutut, imminut pingaartitsisutut kamajasutullu nalilerneqarpoq.
Riskovimi tarnikkut misissuinermi nalilersuinerit saqqummiunneqarneranni angut taanna nalinginnaasumik sianissuseqarpoq, taamaattorli meeraanermini atugarisimasani pillugit eqqarsartaatsimigut innarlerneqarsimavoq. Isiginnittariaatsimigut ajunngitsut ajortullu immikkoortilluinnaqqissaartarpai taakkua akornanni pisut aqussinnaanagit.
Nakorsat eqqartuussinermi siunersiortagaasartut innersuussutigaat, angut 20-nik ukiulik avatangiisiminut ulorianartuunera pillugu Danmarkimut pisinneqassasoq katsorsarneqarlunilu.
Angut 19-nik ukiulik blok 17-imi persutaaqataasimasutut unnerluussaasoq, Riskovimit tarnikkut nappaateqartut napparsimavissuata nakorsaanit misissorneqarpoq, taassuma misissuiffigineqarnera Ilulissani ingerlanneqarluni.
Angut taanna ukiuminut naleqqiullugu inerisimanngilaq. Nammineq qanoq iliuuseqarnissamut suliniuteqarneq ajorpoq Kalaallit Nunaannilu pinerluttunik isumaginnittunit oqaatigineqarpoq ingerlaqqinnissaanut inersimasumik tapersersorteqartariaqarpoq.
Taassuma pineqaatissineqarnissaa akornutissaqanngitsoq tarnikkut misissuinermi erserpoq.
Angut 19-inik ukiulik inuit akornaniissinnaanera akornuteqarsinnaasoq, tarnikkut misissuinerit aallaavigalugit unnerluussisut saqqummiussineranni erserpoq.
Blok 17-imi toqutsinermut tunngassuteqartut Eqqartuussivimmi Sermersuumi eqqartuussinnerit ullumikkut naammassineqarallarput, sapaatip akunnerata sinnerani angutit pingasut taakkua pillugit eqqartuussivimmi suliassanngortitat 28-t suliarineqassallutik.
