Skizofrenertumut ataataq: Tarnikkut innarluutillit akuersaarnerusariaqarpagut

Esekias Therkelsen skizofrenertumik erneqarpoq, taavalu tarnikkut eqqarsartaatsikkullu napparsimasut ilaqutaasullu peqatigiiffianni ukiuni 16-ini peqataaffimmini, Sugisami, siulittaasuulluni.

- Tarnikkut innarluuteqartut nappaateqartullu soorlu tinnaartunik taagorneqartarnerat qangaanerusoq atugaanerugaluarpoq, Esekias Therkelsen oqarpoq. 

Ukiunili kingullerni soorlu taamaattoqartakulannginnerusoq. Suli taamaatoqartartoq, taanna oqarpoq. 

Taamaammat taassuma misissuernerup Tiliumeersup sapaatip akunnerata siuliani saqqummertup inernera tupaallaatiginngilaa. Tarnikkummi innarluuteqarneq timikkut innarluuteqarnermiit innuttaasunit akuersaarneqarnerusoq tassani allaqqavoq. 

AAMMA ATUARUK Inuit tarnimikkut innarluutillit pigiliutiinnakkanik isumaqarfigineqartarput

Nunatsinni taamannak siullermeertumik aatsaat misissuisoqarpoq, misissuinermullu inuit 996-it nunatsinni tamaneersut apersuinermi peqataapput. Inuit tarnikkut nappaatilimmik aappaqarnissaq unammillernarnerutillugu isigigaat erserpoq.

Nunatsinni innuttaasut quliugaangata qulingiluat inunnut ersittumik innarluutilinnut ajunngitsumik isiginneriaaseqarlutik attaveqarsinnaasarput. Tarnimikkullu napparsimagaangata inuit quliugaangata arfineq marluk ajunngitsumik eqqarsaateqarlutik attaveqarsinnaasarlutik

Paqumisuuterpasuit 

Esekias Therkelsenip ernera 20-inik ukioqarluni skizofrenimik nappaateqalersimavoq.

- Ukiut siuliini oqartarnikuuvugut, tarnikkut nappaatillit soorlu paqumigineqarlutik pineqartut, eqqartoruminaatsinneqartut qanorlu annertutigisumik atugaanera, taakkununngalu isiginninneq qanoq ittuunersoq, oqaatigiuminaatsittartorujussuunikuugatsigu, Esekias Therkelsen oqarpoq.

Tarnikkullu napparsimasumut ilaqutaalluni, ajattuisoqaleraangat pikkunartoq, Sugisami siulittaasoq oqarpoq.

- Inuup kialuunniit nalunngilaa ajattorneqarneq qanoq sakkortutigisinnaasartoq. Tarnikkut innarluutilinnut aamma taamaappoq, tamakku qitornat atugaat isigalugit. Mattuttaramik, tunuartaramik inunnullu akuunissartik nangaassutigilertarlugu, taassuuna sakkortusarpoq.

Sullivinni akuersaarneqannginneq

Misissuisut innarluutillit suliffeqarfinni qanoq periarfissaqarnersut qanorlu eqqarsarfigineqartarnersut aamma misissorpaat.

Suliffeqarfiit inunnik innarluutilinnik atorfinitsitsinissaq eqqarsaatigalugu peqataatitsisuunermik ersarinnerusuliorsinnaasut tassani inerniliunneqarpoq.

Ukiunilu kingullerni arlaannik siuariartoqartoq, Esekias Therkelsen oqarpoq.

Assersuutigalugu suliffeqarfinni siusinnerusukkut tarnikkut innarluutilinnik sulisoqarnissaq kissaatigineqarneq ajorpoq, naak sulisinnaagaluartut. 

- Innarluuteqartut qanorluunniit innarluutillit sulisinneqarnerulernissaat ammaffigineqartorujussuanngorpoq, Esekias Therkelsen oqarpoq.

Kisianni innarluuteqarnerusunut tamanna tunnganeruvoq, suliffimminnut tuniussisinnaaneri killeqarsinnaammata, Esekias Therkelsen oqarpoq.

Nunatsinni tarnikkut nappaatillit 1.400-t missaaniissangatinneqarput.