Tarnikkut ikiuineq
Politiit politeeqatitik sulinermi sakkortuumik misigisaqarsimasut pisariaqartitsisullu ikiortalertussaavaat. Suleqatinik oqaloqateqartartussanik 15-inik ilinniartitsisimapput, politiillu peqatigiiffiata siulittaasuata, Aqqaluk Petersenip nuannaarutigaa.
Politiit sulinerminni misigisaqartuarput sakkortusiartortunik, soorlu annaassiniarnerni, illoqarfimmi sulinerminni assigiinngitsorpassuarnik, soorlu pinerluttulerinermi inunnillu toqutsinermut atatillugu, tamannalu qangalili malunnarsiartuinnarsimavoq, Aqqaluk Petersen oqarpoq.
Tamanna tunngavigalugu politiit ikioqatigiillutik ajornartorsiutinik aniguiniartarnissartik qangalili oqaloqatigiissutigisarpaat politeeqatimillu ilaat maanna 15-it immikkut ilinniartissimavaat suleqatinik misigisarliorsimasunik oqaloqatiginnittartutut misigisarliorsimasut piaarnerpaamik misigisaminnik nuanniitsunik aniguisinnaanissaat siunertaralugu.
Aqqaluk Petersen oqarpoq aaqqissuussineq taanna piaarnerpaamik atulissasoq ukiorlu qaangiuppat naliliineqassaaq oqaloqatiginnittartut amerlisarneqassanersut. Politimesterip tullia Steen Silberg Thomsen oqarpoq Danmarkimi periaaseq taamaalilluni eqqunneqartoq paasigamikku politiit pisariaqartilluinnaraat.
