Tarnikkut ikiueqqaarnermi ilitsersuisutut naammassisut siulliit
Sapaatiummat Sungiusarfik Aaqami pisortatut atorfeqartut arfineq pingasuusut pikkorissartinneqareerlutik tarnikkut ikiueqqaarnermi ilitsersuisutut imminnut taasinnaalerput. Pikkorissaaneq Kalaallit Røde Korsiata ikiueqqaarnermut ataatsimiitsitaliaata aaqqissuussaraa. Pikkorissartut nalunaaquttap akunnerini 24-ini pikkorissartinneqareerlutik allagartartaartinneqarput.
Sungiusarfik Aaqami pisortaasut pikkorissartitsinermi ilikkakkatik ulluinnarni sulinerminni atortarumaarpaat. Sungiusarfik Aaqa suliffeqarfiuvoq inunnik skizofrenertunik sullissisoq. Skizofrenertunut najugaqarfiuvoq, immikkoortortaqarfiisa ilagaat sullivik Alloriarfik, saniatigullu aamma immikkoortortaqarfeqarluni Prader-Willi Syndrom-eqartut angerlarsimaffigisaannik.
Pilersaarutit malillugu tarnikkut ikiueqqaarnermi ilitsersuisut nutaat arfineq pingasuusut suliffimminni sulisut tarnikkut ikiueqqaarnermik ilinniartissavaat. Sulisut taamaalillutik suliffeqarfimminni sakkortuunik misigisaqartitaassagaluarunik, arlaatigulluunniit inuunerminni artornartunik nalaataqassagaluarpata qanoq periuseqartoqarpat pitsaanerussanersoq nalussanngilaat. Inuunermi sakkortuunik pisoqartillugu soorlu nalaanneqartartut tassaapput ajutoorneq, inuunermik navianartorsiorluni nappaammik eqqugaaneq, toqukkut qimagaaneq, avinneq, suliffimmi qinngasaarneqarneq persuttarneqarnerluunniit.
- Pingaaruteqartorujussuuvoq pisut tamakku pimoorullugit suliarinissaat, inuunerullu naleqassusaanut akornusiinerisa annertusinnginnerini ikiuinissaq, Kalaallit Røde Korsiata allaffeqarfiani pisortaq Kirsten Mortensen allappoq.
Pikkorissaasuuvoq tarnip pissusaanut tunngasunik peqqissaasutut ilinniarsimasoq Røde Korsimilu ilitsersuisartunut sungiusaasartoq Olav Øfverlind Pedersen. Saniatigut aamma ikiueqqaarnermi ataatsimiititami Kalaallit Røde Korsiata ataaniittumi Olav Øfverlind Pedersen-i siulittaasuuvoq.
- Kalaallit Røde Korsiata takorluugaraa ilinniartitsineq nutaaq una siaruarterneqassasoq, siunissamilu Nunatsinni illoqarfinnilu tamani tarnikkut ikiueqqaarnermi pikkorissaasartoqalernissaa. Pingaaruteqarluinnarpoq inuppalaartumik ikiuinissaq inuunermi pisuni sakkortuuni, inoqatigut tapersersorlugillu ikiorsinnaanissaat inuttut tamarmiusutut inuuneq ingerlateqqissinnaajumallugu, Kalaallit Røde Korsiata allaffeqarfiani pisortaq Kirsten Mortensen allappoq.
