Tarnikkut ikiueqqaarnermi ilitsersuisartut nutaat qulit

Peqataasut qulit nunatsinnit tamaneersut tarnikkut ikiueqqaarnermik sapaatit akunnerata naanerani pikkorissartinneqarput. Tamatumani uummarsaanissaq Nato-stillingimillu taaneqartartumik inissiinissaq pisariaqanngilaq, peqataasulli tarnikkut ajornartorsiutinik sunilluunniit qaangiiniarnissamut periutsinik  ilinniartinneqarput. Tassaasinnaapput tassanngaannartumik toqusoorneq, aapparisamit avinneq, inuttullu ajornartorsiutit allat tamatta aqqusaarsinnaasagut.

-Nutaanik ilitsersuisoqalernera nuannaarutigaara, tarnikkulli ikiueqqaarnermik ilinniarusuttut qulinit amerlanerunnginnerat eqqumiigilaarpara. Atuarfinni tamani tarnikkut ikiueqqaarsinnaasumik ikinnerpaamik ataatsimik sillimaniartoqartariaqaraluarpoq. Tamanna aamma napparsimmavinnut imaluunniit ilinniarfinni ingerlaqqiffiusuni ilinniartunut ilitsersuisartunut aamma atuuppoq. Nutaamik eqqussiniarneq sivisusinnaasoq akueraarput, tullianili tarnikkut ikiueqqaarnermi ilitsersuisussanik pikkorissaalerutta soqutigineqarnerunissaa neriuutigaara, Kirsten Mortensen, Kalaallit Røde Korsiani allattoqarfimmi pisortaq knr.gl-imut oqarpoq.

Cooperative learningimik suliaqartoqarnerata malitsigisaanik ilitsersuisutut pikkorissarnermi peqataasut annertuunik piumasaqaateqarfigineqarut. Pikkorissartut ilinniartitsinermut akuutinneqarput aallaqqaataaniillu peqataatinneqarlutik. Peqataasut aamma tarnikkut unammillerneqarput, pikkorissarnerummi ingerlanerani suliarisariallit nutaat takkussuutiinnavittarmata. Nammineq misigisaasinnaapput imaluunniit peqataasut allat misigisimasaat.

-Peqataasut nuannaartupilussuupput, taakkulu angerlarunik suleqatitik ilinniartissinnaanngorpaat. Peqataasut ilarpassui sillimaniarnermut aqutsisoqarfimmeersuullutillu kommunit meeqqanut ilaqutariinnullu immikkoortortaaneersuupput, tassungalu atatillugu tarnikkut ajornartorsiutit pillugit paasinnilluarsinnaaneq pisariaqartinneqartarpoq. Tarnikkut ikiueqqaarnermi ilitsersuisutut ajornartorsiutinik tamanik aaqqiisinnaanngilagut, amerlasuutigummi ilinniarsimasunut innersuussisariaqartarpugut. Pikkorissartortavut atorluarsinnaasaminnik ilikkagaqarluarput, immikkulli ilisimasalinnut innersuussinissarput annilaangatiginngisaannassavarput, Kirsten Mortensen oqarpoq.