Tarnikkut eqqugaasarput

juulip 20-at 2006 10:41

Sorsunnerit tamarmik tarnikkut ikiliisarput aaqqinneqarsinnaanngitsunik – aamma annakkaluaraannilluunniit.

Palæstinamiut jyllandimi nunasinikut paniat oqaluttuarpoq qanoq ilaqutariit Libanon-imit qimaasimanersut:

- Qimaanitsinni amerlasooriarluta aqquserngit ikaartarfiillu ingerlaffigeqqammisagut qaartartumeerneqartarput, radiokkullu tusaasarparput biilerluta saneqquteqqamisagut minutsit pingasut sisamat qaangiukkaangata qaartartumeerneqartartut, Maimura oqaluttuarpoq.

Sapaatip akunnerata naanerani angajoqqaani qatanngutinilu nukarliit pingasut ilagalugit Libanon-ip kujataaniit Beirut-ikkoorlutik Syria-mut qimaasimapput. Qimaaneq ullut pingasunik sivisussusilik qaartartut akornatigut pivoq.

- Uiversimavugut, ersiinnaavillutalu, poortuigaangattalu ilumut qimaalluta paasisarparput. Nalunngikkaluarlugulu ilumoortoq ilumoorpasinngiivittarluni. Qimaagaangattalu aqaguani tusartarlutigu piffiit qimatagut qaartartumeerneqarsimasut, sumullu pigaluaraangatta aarleriuaannarpugut qimatagut tamarmik qaartartumeerneqartarmata, oqaluttuarpoq.

Uannut Libanon-imit qimaaneq sorsunnerup annilaanganartuinik misigisara siulliuvoq. Anaananulli qaartartut nipaat annilaanganartumik ilisarnarput, taanna 80-ikkunni Danmark-imut pivoq Libanon-imi inuit imminnut sorsunnerannit qimaalluni.

- Qimaagatta eqqaavara, taamani anaanaga ilagalugu uagut qimaagatta, ilimaginikuunngikkaluarpara meerara ilagalugu aamma qimaaqqissallunga, kisiannili taamak pisoqarpoq.

Sorsunnermit qimaaneq misigisaq ajornerpaavoq, sulili ajorneruvoq meeqqani ilagalugit qimaaneq, Mona Maimura-p anaanaa oqarpoq.

Ilaqutariillu Danmark-imut utereeraluartut suli ersiorsimanerat malunnarpoq, sinnattupilunneq eqqissiveqannginnerlu suli atugarigamikku.

Ilaqutariit pinasortumik tarnikkut ikiorserneqarput.