Tappiorannartut naajaarnerusalernerat akornusiisinnaavoq
Issittumi uumasut ajuuvissumik nalaataqarnissaat, USA-mi Immamik Ilisimatusarfimmi, Scrippsimi, ilisimaneqaqisumi, ilisimatuut maanna aarleqqutigaat.
Tappiorannartut - naasut quajaatillu - uumasut inuussutissaannut pingaaruteqarluinnartut, pisarnerminnit ullut 50-it missaannik siusinnerusumik naajorarsimasut ilisimatuut paasivaat.
Mati Kahru, Immamik Ilisimatusarfimmeersoq aviisimut Washington Postimut oqarpoq, siku siornatigumut naleqqiullugu maanna aakkiartornerulermat tappiorannartut aamma naajaarnerusalersut.
Tamanna ima isumaqarsinnaavoq inuussutissat uiguleriiaat siusinaarlutik takkuttalissasut, uumasuaqqat tappiorannartutortarput, taavalu aalisakkat raajallu aalisagaarartortarlutik. Timmissat aalisagartortarput, nannut puisillu taakku aamma nerisaraat.
Naasut quajaatillu ullunik 50-inik siusinaarlutik naasalissappata, tassa septembarimi naanatik juulimi naasalissappata, uumasut rytmiat innarlerneqassasoq, ilisimatuut isumaqarput.
Taamali pisoqarnera Issittumi uumasunut qanoq kinguneqassanersoq ilisimatuut suli oqaatigisinnaanngilaat.
Qaammataasat USA-meeersut Europameersullu atorlugit Kahru ilisimatooqataalu paasissutissanik ukiuni aqqaneq-marlunni, tassa 1997-imiit 2009-mut, katersuisimapput.
