Tappiorannartut iluaqutiginiarneqarput

Kalaallit Nunaanni pinngortitaq qularnanngitsumik erlinnartuuterpassuaqarpoq, taakkuali allisitsiuserluni aatsaat takuneqarsinnaallutik. Erlinnartuutimmi uumasuaqqani tappiorannartuniipput, Kalaallit Nunaannilu suli tamakkua annertunerusumik paasiniarneqaratik.
novembarip 10-at 2009 10:22

Tappiorannartut annertunerusumik iluaqutiginiarnissaannut Kujataani Ikkami immap naqqani napasuliaasat Kalaallit Nunaata neqeroorutigisinnaasaannut assersuutaannaapput. Taama oqarpoq Københavnip Universitetianeersoq ukiorpassuarni enzyminik bakteerianillu ilisimatusarsimasoq Peter Stougaard.

Kalaallit Nunaanni sermersuaq taaneqaannarsinnaavoq. Sermersuarmi qillerinernit sermiminernit qallorneqartartunit bakteeriat amerlasoorparujussuit nassaarineqarput, amerikamiullu ilisimatusartut sermiminerni qallorneqartuni taakkunani enzyminik soqutiginartunik nassaarsimallutik. Kalaallit Nunaanni puilasut nillertut amerlaqaat, puilasoqarlunilu kissartunik, aamma soqutiginartunik uumasuaralinnik, Avannaanilu naasut qiviassagutsigik taakkua aamma stoffinik amerlasoorparujussuarnik sanaartorput, uumasuaqqat atorlugit nakorsaasiornermut atorneqarsinnaasunik.

- Misissorneqanngitsutuarli tassa imaq, Peter Stougaard oqarpoq. Uumasut assigiinngisitaarnerat nunami issittumi nunani kiattuninngarnit annikinnerusoq isumaqartoqartarsimagaluarpoq, kikkut tamarmik isumaqarsimagaluarput kiattuni orpippassuit sialoqartitsisartut uumasuarai assigiinngisitaarnerusut, paasinarsivorlu uumasuaqqat tappiorannartut issittumiittut kiattuniittunisulli amerlatigisut. Issittumi uumasuaqqanik tappiorannartunik assorujussuaq peqarpoq, tamakkualu suli misissuiffigineqarsimanngivillutik. Oqarusuppunga Kalaallit Nunaat aningaasanik eqquiniaanermi eqqugassatut pitsaasutut ittoq enzyminik soqutiginartunik imalimmik.

Uumasuaqqanilli tappiorannartunik tunisassiorneq milliardinik iluanaarutaalernavianngilaq, akerlianilli aamma aningaasaliissuterparujussuit atornagit tunisassiorfissuanngorsinnaalluni.

Suliffeqarfiit universitetilluunniit uumasuaqqanik tappiorannartunik iluanaarniuteqarlutik iluatsitsissappata, Kalaallit Nunaata pissarseqataanissani inatsisikkut qulakkeersimavaa.