Tappiitsut isigiarsuttullu pillugit siullerpaamik pikkorissaaneq
Nuna tamakkerlugu tappiitsut, isigiarsuttut, qanigisaasut tapersersortitullu sullissisut katillugit 28-t Nuummi Sømandshjemmimi marlunngornermit sisamanngornermut, IPIS suleqatigalugu Danmarkimi Tappiitsut Kattuffiata - Dansk Blindesamfundip aaqqissuuganik siullerpaamik pikkorissaasoqassaaq.
marsip 02-at 2013 10:11
Pikkorissarnissaq ulluni pingasuni ingerlanneqalerpat peqataasussat pisariaqartitaat aallaavigalugit naleqqussakkamillu pikkorissaasoqassaaq.
- Pikkorissarnermi peqataasussat sapinngisamik inuiaqatigiinni periarfissagissaarnerulernissaat nammineersinnaanerulernissaannullu aqqutissiuinissaq matumani siunertaavoq. Taamaattumik peqataasussat 28-t akornanni assigiinngitsunik pisariaqartitsisoqarmat ataasiakkaat samminerullugit pikkorissaasoqassaaq, IPIS-mi pisortaq, Naja Rosing Fleischer knr.gl-mut oqarpoq.
Danmarkimi Tappitsut Kattuffiannit ilitsersuisussat ilaat tappiitsuupput isigiarsuttuullutilluunniit isigisinnaasunit sanilliullugit tappiitsut pisariaqartitaannik ilitsersuilluarsinnaanerummata tamanna pissusissamisoorluinnarpoq.
