Tappiitsoq pillugu isumaqatigiinngissuteqartut
Tappiitsup tapersersorteqartarneranut kommunip annikillisaasimanini nalilersoqqittariaqarpaa, Isumaginninnermut Naalakkersuisup pingasunngormat Nuuk TV-mut taama oqarpoq.
Sulianut ataasiakkaanut tunngasunut Naalakkersuisoq oqaaseqartarnera takornartaananilu ileqqorineqanngilaq, ingammik suliamut tunngasumut paasissutissat eqqortut ilisimanagit, Kommuneqarfik Sermersuumi Borgmesteri naammaginninngeqisoq taama oqarpoq.
- Erseqqissartariaqarpara, massakkut atuuttut aallaavigalugit 65-liigaluarpalluunniit aamma kommuni pisussaaffeqarpoq ikiorsiissalluni pingaartumik aaamma peqqinnissaq aallaavigalugu tunngavissaqarpoq inatsisitigut ikiorsiinissanut, Isumaginninnermut Naalakkersuisup Martha Lund Olsenip Nuuk TV-mit oqaluttuarineqartoq tappiitsup 65-nik ukiullip tapersersorteqartarnerata Kommunimit 48 tiiminit 6 tiimiinnanngornera pillugu Nuuk TV-mut taama oqarpoq.
Angutip taassuma utoqqalinersiaqalernerata kingorna tapersersorteqarnissamut annikillisaavigineqartarsimanera Martha Lund Olsenip oqaaseqarfigaa.
Kommunimiit paasissutissiineq tunngavigalugu tamanna ilumuunngilaq angutilli pisinnaasaasa nalileqqinneqarneranut annikilliliineq tunngaveqarpoq
Kommunillu suliaq nalilersoqqissagaa Naalakkersuisup isertuutinngilaa.
- Inuk ulluni kingullerni sammisarsi pisinnaasai nammineerluni taama killeqartigisut pitsaanerusumik naleqarnerusumik inuuneqassaguni aamma pisariaqartitai annertunerusut nalilersoqqittariaqaraat isumaqarpunga, Isumaginninnermut Naalakkersuisoq Martha Lund Olsen taama oqarpoq.
Borgmesteri akerliuvoq
Isumaginninnermut Naalakkersuisup Martha Lund Olsenip pissusiviusunik ilisimasaqarani oqaaseqarnera Kommuneqarfik Sermersuumi Borgmesterip tupigaa tulluarsorinagulu:
- Ileqqorissaarnerusorinngilara naalakkersuisup inummut aalajangersimasumut tunngasumik oqaaseqarnera, tusagassiorfitsigut paasissutissiisoqarnera taamaallaat tunngavigalugu. Imannak isumaliorneruvunga Martha Lund Olsen sukkavallaartumik qisuariartoorsimasoq kommunillu sullissinera oqaaseqarfigalugu massa pissusiviusut ilisimanagit, Kommuneqarfik Sermersuumi Borgmesteri Asii Chemnitz Narup taama oqarpoq.
Kommunip aalajangerneranut tunngaviit
Angummullu tappiitsumut sulianut tunngasunut kommuneqarfik Sermersuumit paasissutissanik pissarsisinnaaneq KNR-mit inuttaanut akueritipparput.
Tassani erserpoq angutip nerisaqarnermut ullukkut ornittakkanut neqeroorutit piumasimanngikkai aamma tapersersorteqarnissamut neqeroorutip 26-tiimiusup novembarip qaammataani 8 tiimiinnaat atorsimagaa, decembarimilu 5 tiiminnaat.
Tapersersorteqarnerlu angalaarussinermut tunngaveqanngitsoq tapersersortini angalaarutsinnernut atortarsimavai, itigartinneqaraangamilu sukangasumik pissuseqarfigisinnaasarlugit.
Kommuneqarfik Sermersuumiit paasissutissiissutigineqarpoq angutip tappiitsup tapersersorteqarnissaq sivisunerusoq qinnutigisinnaagaa maannakkullu taamaalioreersoq oqaatigaat.
