Tappavani inunnguaq taanna
- Oqaluttuarineqarpoq, angutip inuunermini aqqusaagai. Taanna inuuneq imatut aqqutinnguatut tassani oqaluttuarineqarpoq. Tassanilu aqqummi taassumap angutinnguup naapitai, inuunitsinni misilittakkagut assigisaallu oqaluttuarineqarput,Miki Fencker Thomsen, isiginnaagassiaq Tappavani inunnguaq taanna pillugu oqarpoq. Frederik Kunngi Kristensenip taalliai erinniai eqqumiitsuliaalu aallaavigalugit Silamiut ukiuni 25-nngortorsiornerminnut atatillugu isiginnaagassiorput, taannalu arfininngorpat augustip 29-ani siullermik takutinneqassalluni. Isiginnaagassiami inuttaaqataasup Viivi Sørensenip isiginnaagassiaq "Tappavani inunnguaq taanna" ima isumaqarfigaa.
- nuannersorujussuuvoq, uanga isumaga malillugu, taallat erinarsuuteqarpassuillu allat atorneqaraluartut, kisianni tappavani inunnguaq taanna, soorlu suna tamaat nuannersisikkaa, oqaluttuarpalaartilerlugu, taavalu tupinnartunngortillugu, soorlu titartakkanik isiginnaaginnarluni, Viivi Sørensen oqarpoq. Isiginnaagassiaq "Tappavani inunnguaq taanna" Inuk Silis Høeghip aamma Makkak Kleistip ilitsersuiffigaat. Inuk Silis Høeghip Kunngip suliai pillugit ima oqarpoq.
-Uannut pissarsinartorujussuuvoq, siornatigut Kunngip suliai atualaartarnikuugaluarlugit, kisianni massakkut tamagajaaviisa atuarlugit aamma paasillugit qanoq imartutiginersut. Tissinarsinnaapput, ilai nuannerlutik, asanninnermik imaqarlutik, tamarmik kissalaarput, Inuk Silis Høegh oqarpoq. Kunngip silarsuaa tigulaariffigineqarluni isiginnaagassiaq suliarineqarpoq, taalliai, erinniai kiisalu eqqumiitsuliai isiginnaagassiami erserpullusooq, isiginnaartitsivik sisamanik qiteralilimmik, ammaluusattumik kiisalu portusuumik ilusilersorneqarpoq, tassa soorlu Kunngip qalipagaasa ilaanit tigusaq. Isiginnaagassiamut Kunngip aallaavigineqarnissaa Silamiut pisortaata Svenn Syrinnip isumassarsiaraa.
- Eqqumiitsuliortoq, taalliortoq erinniartorlu suli inuusoq, Kunngi, nunasiaataanermiit, namminersornerulernermut kiisalu namminersorneq tikillugu misigisaqarpoq suliarpassuaqarluni, Svenn Syrin ilaatigut isumassarsinini pillugu taama oqarpoq. Isiginnaagassiaq Tappavani inunnguaq taanna Silamiut isiginnaartitsisarfianni arfininngorneq 29.august unnukkut arfineq pingasut qeqqanut takutinneqaqqaassaaq. Septembarillu 13.-iani Nuummi naggataamik takutinneqassalluni, kingusinnerusukkut KNR-tv-ikkut aallakaatinneqarumaarpoq.
