Tapiissutit naleqqussarneqassanersut assortuussutigaat
Danmarkip Savalimmiunut 600 millioni koruunit missaat ukiumut tapiissutigisartagai aappaagumiit akit naapertorlugit naleqqussarneqartalissanersut Savalimmiuni naalakkersuisut danskillu naalakkersuisuisa iluminni aaqqiagiinngissutigaat.
Tapiissutinut isumaqatigiissut maanna atuuttoq ukiortaamiit atorunnaartussaavoq, naalakkersuisullu qanittukkut nutaamik isumaqatigiinniartussaassapput.
Tapiissutit akit naapertorlugit naleqqussarneqartalernissaat Savalimmiuni Sambandspartip kissaatigaa, illuatungiuttulli marluk – Socialdemokratit Folkeflokkenilu isumaqarput aningaasanut tunngassutilinnut Savalimmiut nammineeriartirnissaminnik anguniagaat ingerlatiinnarneqassasoq, akit naapertorlugit naleqqussaanissaq taamaalillutik pisariaqartissanagu, aamma taamaalillutik Danmarkimiit tapiissutit amerlisariaqassanatik.
Danmarkimiit tapiissutit, Savalimmiut namminneq kissaataat malillugu, 900 millioni koruuniniit 600 millioni koruuninut appartinneqarsimapput.
