Tapiissutit ataatsimoortut ukiumoortumik tunniunneqartuartarnissaat inassutigineqarpoq

Tapiissutit ataatsimoortut, ukiumut 3,2 miliardi koruuninik annertussusillit, Namminersornerullutik Oqartussat atuunnerat tamaat ukiumoortumik tunniunneqartassasut, Namminersorneq pillugu Isumalioqatigiissitap suleqatigiissitaliaanit inassutigineqarpoq.

Aningaasaqarneq pillugu aaqqissuussineq nutaaq taama siunnersuusiarineqarlunilu aningaasaqarneq inuussutissarsiutitigullu ineriartortitsinissami Isumaqalioqatigiissitami suleqatigiissitaliap inassutigaa.

Isumalioqatigiissitap tamarmiusup siunnersuut akuerissappagu, naggaterpiaatigullu aamma Inatsisartunit akuerineqarluni, taava tapiissutit ataatsimoortut naalagaaffimmut ukiut tamaasa siunissami ukiut pingasut qaangiunneri tamaasa isumaqatigiinniutigineqaqqittariaqarunnaassapput. Tapiissutit pillugit maannakkorpiaq aaqqissuussisimaneq Namminersornerullutik Oqartussanut ukiumut naalagaaffimmiit 3,2 milliardi koruuninik pissarsissutaasarpoq. Tapiissutit ataatsimoortut pillugit ukiunut pingasunut siornatigut isumaqatigiissusiortarsimanermut tunngatillugu isumaqatigiissusiamut nutaamut ilanngunniarneqartoq tassaavoq, pisuussutinit uummaatsuniit, kiisalu aatsitassarsiornermi qallukkaniit isertitat ukiumut 75 millioni koruuninit sinneqartut isertitsissutigineqartillugit naalagaaffiup Namminersornerullutillu Oqartussat aveqatigiittassagaat inassutigineqarpoq.

Namminersornerullutik Oqartussat aningaasaqarnikkut pisortaanerat, Peter Beck, nassuiaateqarpoq, taama inassuteqarnermi suut pingaarnerutinneqartut:

Namminersorneq pillugu Isumalioqatigiissitap isumaliuutissiissutini Inatsisartunut ukiaru septembarimi saqqummiutereerpagu, Folketingimi kingorna saqqummiunneqassaaq, taava siunnersuutit inassuteqaatillu tassani naggataarutaasumik suliarineqassapput.

Taamatullu suliaqarneq ukiualunni ingerlasinnaavoq, Peter Beck oqarpoq.

Namminersorneq pillugu Isumaqalioqatigiissitami ilaasortat tulliani 18. april naapeqqissapput.