Tapiissuteqartoqaqqissanersoq tallimanngorpat isummerfigineqassaaq

decembarip 07-at 2005 05:40

Puisit amiinut tapiissuteqartoqaqqissanersoq Inatsisartut Aningaasaqarnermut Ataatsimiititaliaata tallimanngorpat oqaluuserissagaa, siulittaasuat Atassummeersoq Ellen Christoffersen allappoq.

Piniartut tapissutitaqanngitsumik ulluni makkunani ameeruteqartarput, tamannalu inuuniarnerannut annertuumik ajornartorsiortitsilermat naalakkersuisut ilaatigut kommuninit avannaaniittunit piumaffigineqarput puisit amiinut tapiissuteqaqqeqqullugit, naalakkersuisullu tallimanngormat tamanna isummerfigaat.

Aalisarnermut Piniarnermullu Naalakkersuisoq Finn Karlsen, Atassut, tallimanngormat oqarpoq, ukiup naanerata tungaanut puisit amiinut 15.000-inut, 1,6 million koruuninillu tapiissutitigut naleqartunut, tapiissuteqartoqarnissaanik naalakkersuisut Aningaasaqarnermut Ataatsimiititaliamut inassuteqarsimasut.

- Qinnuteqaatip naammassillugu tallimanngorpat suliarinissaa naatsorsuutigaarput, Ellen Christoffersen allappoq.

Piniartutut inuussutissarsiutillit kisimik tapiiffigineqarnissaat qinnuteqaatigineqarpoq, aamma natsersuit ussuillu amii matumani pineqanngillat.