Tapiisarnitik unitsinniarlugit siorasaaripput

Danmarkip Kenyami aallartitaa, Bo Jensen Nairobimiit nalunaarpoq.

Bo Jensen oqarpoq Kenyami tusagassiuutitigut nalunaarutigisimagini pissutsit ernumanartutut isiginerat ersarissarini kiisalu isumaqatigiissitsiniarnerit tapersersorneri erseqqissaatigalugu. Bo Jensen Kenyamut naalagaaffiit aningaasanik tapiisartut ataqatigiissaarisuinut siulittaasuuvoq. Naalagaaffiit tapiisartut tassaapput, EU-mi ilaasortat arlallit, USA, Japan, Canada EU-lu nammineq. Naalagaaffiit aningaasanik tapiisartut tapiissutitik Kenyami naalakkersuisunut tunniuttaraluarpaat, præsidentimulli qinersinermi Kibaki pinerlussimaneragaammat naalakkersuisutullu ileqqorissaartutut pissusilersunngimmat, soorlu inuit pisinnaatitaaffii, inatsisinik atuutsitsisinnaaneq, kiffaanngissuseqarneq demokratiilu malillugu ingerlatsinissamut maleruagassat unioqqutissimammatigit naalagaaffiit tapiisartut pissutsit manna tikillugu ingerlanerat akueriinnarsinnaannginnamikkit Kenyami naalakkersuisut suleqatigiunnaarpaat, ataatsimeeqatigissaarlugit aningaasanillu tunissaarlugit. Bo Jensen oqaluttuarpoq naalakkersuisut isumaqatigiissusiornissamut siunnersuummik saqqummiussippata aatsaat suleqatigeqqikkusulersinnaassallugit. Naalakkersuisut illuatungiliuttullu isumaqatigiissinnaassappata naalagaaffiit tapiisartut siornatigutut suleqatiginnissinnaallutik nalunaarput taamaanngippalli tapiiuaannassanerlutik eqqarsaatigeqqissamaarpaat aningaasallu tapiissutigisartakkamik amerlassusaat aamma eqqarsaatigeqqissamaarlugit, Bo Jensen Nairobimiit nalunaarpoq.

Danmarkip naalagaaffia Kenyamut ukiumut 230 millioner koruuninik tapiisarpoq, taakkunanngalu 150 millioner koruunit suliariniakkanut atugassatut Naalakkersuisunut aqutassanngorlugit tunniunneqartarput.