Tapersersorteqartitsinermik suliniut aallartilluarpoq
Kalaallit Københavnimut nooqqammersut isumagisassanut nalinginnaasunut tapersersorteqartinnissaat eqqarsaataavoq.
-Aaqqissuussinerup matuma pitsaaqutigaa angusassamik toraagalimmik ikiusitsisinnaagatta. Kalaallit Nunaannit nuuttoq sutigorpiaq ikiorneqarnissaa pillugu oqaloqatigisarparput. Suliffissarsiornissamik imaluunniit initaarniarnissamik pisariaqartitsiva? Imaluunniit aalajangersimasumik attaveqarfissaminik oqaloqatigisinnaasaminillu pisariaqartitsiva, Mille Schiermacher, suliniummik aqutsisuusoq oqarpoq.
Ilimmik atuisut ilaatigut tassaapput ilinniartut, katsorsartikkiartortut inuillu ilaquttatik pissutigalugit Danmarkimut nuuttut. Tapersersorteqarusuttut qulit aasap ingerlanerani tapersersortissarsitinneqarput. Ikiorneqarnissamillu pisariaqartitaat assigiinngitsorpassuupput - soorlu biilimik ingerlatsisinnaanermut allagartap allanngortinnissaa inissiamillu pisiniarnermi ikiorneqarnissaq, Mille Schiermacher oqarpoq nangillunilu:
- Isumagisassanut nalinginnaasunut assigiinngitsunut ikiuisoqarsinnaavoq, aamma amerlanertigut inunnik nuannersumik naapisimaaqatigisinnaasanik peqarnissaq pineqarpoq, maangami nuulluni ilaatigut tupaallannarsinnaammat.
Danmarkimi kalaallinut ikiortarialinnut taama siusitsigisukkut ikiuisinnaasunik allanik suliniuteqanngilaq, aamma sullinniarneqartut, immikkut ikiortariaqaleratarsinnaasutut inissisimasut, pissarsiarineqarnissaat ajornakusoorsinnaasarpoq. Imatulli ikiuineq pitsaalluinnartumik sunniuteqarsinnaavoq, Mille Schiermacher oqarpoq.
-Assersuutigalugu amma akiitsulersorpallaartoqalinnginnissaanik ikiusarpugut. Aalajangersimasumimmi najugaqarfissaqanngikkuit Danmarkimiinnerit akisuupilussuanngorartarsinnaavoq. Aamma nukissaqarpallaanngikkuit atornerluisut akornannut pilertupallassinnaavutit. Atuisut aamma ilagaat sivisunerusumik maaniissimasut nukissaqarluartullu, inuuniarnikkulli artorsaateqartut. Aamma atuisut ilaqarput aallaqqaataaniilli annertuumik ikiortariaqartut, taakkulu sapinngisatsinnik ikiorluarniartarpagut.
Ilik 2014-imi aggustip qaammataata tungaanut aningaasalersorneqarallarpoq, ilaatigut Oak Foundationimit aningaasaliiffigineqarluni.
