Tanbreezip suliniutaa pillugu tusarniaaneq NGO-t sivitsoqquaat

Teknikkikkut paasissutissanik nalunaarusianik arfinilinnik, tusarniaanermi tamanit pissarsiarineqarsinnaasimasariaqaraluartunik, tusarniaanerup naammassineqarnissaa ullunik arfinilinnik sioqqullugu nassiussisoqarsimanera, Nunatsinni NGO-tut suleqatigiit tusarniaanerup sivitsorneqarnissaanik piumasaqarnerminnut pissutaatippaat.

NGO-t suleqatigiit isumaqarput paasissutissat tusarniaanermut atatillugu atugassat tamaasa Namminersorlutik Oqartussat tusarniaanermut isaaviannit pissarsiarineqarsinnaanngorsimatinnagit tusarniaanermi piffissaliussaq nalinginnaasoq sapaatit-akunnerinik arfineq-pingasunik sivisussuseqartoq naammassineqarsinnaanngitsoq.

Nalunaarusiat avammut saqqummiunneqaqqammersut nunami uumasunut, uumasunut miluumasunut imarmiunut kiisalu silap pissusiinut, imermut, tasersuup Fostersøp  misissuiffineqarneranut, pujoralaap sunniutigisinnaasaanik misissuinermut sumiiffiullu itsarsuarnitsanik ilisimatusarfigeqarneranut tunngasuupput.

- Suliniup kingunerisinnaasaanik tamanik tamakkiisumillu innuttaasut paasitinneqarnissaat pingaaruteqarluinnarpoq. Tusarniaanerup ingerlanerani taama kingusitsigisukkut nalunaarusiat taama pingaaruteqartigisut isummerfigisussanngorneri ajorpallaaqaaq, NGO-t akerliunerminnik nalunaaruteqarlutik taama allapput.

- Naalakkersuisut ammasuunissamik piianissamillu suliniutinut tunngatillugu paasissutissanik tamanik saqqummiussisarnissamik qineqaqqusaaruteqarnertik qinersinermi ilaatigut ajugaassutigaat. Naalakkersuisut neriorsuutigisatik eqqaamassagaat neriuutigaarput, uagullu NGO-t soqutigisaqartullu allat tusarniaanerup pitsaasumik ingerlanneqarnissaanut piffissamik pisariaqartumik tunilluta, NGO-t akerliunerminnik nalunaaruteqarlutik taama allapput.