VIDEO Tanbreezip isornartorsiuinera Uldumip inissaminiinnginnerarpaa
Piiaanerup 0,5 millionit tonsinit 1,5 millionit tonsinut annertusineqarnera (qinnuteqaqqinnissamik piumasaqaateqarnermut, aaqq.), tassalu pingasoriaatinngortinneqarnera, pissutaanerpaavoq.
- Naalakkersuisut avatangiisinut sunniutaasinnaasut ilisimanagit qinnuteqaatinik akuersissuteqarnavianngillat. Taamaammat misissueqqittoqarnissaanik kissaateqarluta nalunaarutigaarput.
- Aatsitassanut inatsit malittussaavarput, matumanilu aamma taamaaliorpugut, aningaasaqarnermut naalakkersuisoq, Anda Uldum, KNR-imut taama oqarpoq.
Aamma atuaruk Tanbreez: Kalaallit Nunaat aatsitassarsiornikkut unammillersinnaanngilaq
Ukiut pingajuat avillugu utaqqisut
Tanbreezip pisortaanerata, Greg Barnesip, aatsitassarsioqatigiiffimmi Australiameersup piiaanissamut akuerineqarnissamik qinnuteqaammik nutaamik tunniussisariaqarnera narrujuummissutigaa, Kujataanimi Killavaat Alannguanni aatsitassanik 1,5 millionit tonsit piiaarusukkamik akuersissutigineqartut 0,5 millionit tonsit pinnagit.
Tanbreezip qinnuteqaataata siulliup tunniunneranit ukiut arlallit maanna qaangiutereerput.
- Nunani allani akuerineqarnissamik qinnuteqaateqarnermi 66.000-132.000 koruunit missaannik akeqartarpoq qinnuteqaallu qaammatini pingasuni suliarineqartarluni. Matumani ukiut 2,5-ingajannik utaqqitinneqarneq Kalaallit Nunaata nunarsuup sinneranut naleqqiullugu unammillersinnaassuseqannginneranik takutitsivoq, Greg Barnes KNR-imut taama oqarpoq.
Aamma atuaruk Naalakkersuisut aatsitassarsiortitseqatigiinnut nikallortitsivoq
Qinnuteqaat nutaaq sukkasuumik suliarineqarsinnaassaaq
Anda Uldumip erseqqissaatigaa sivisuumik utaqqisariaqarsimanermut pissutaasoq tassaammat Tanbreez Miningip qinnuteqaammik pitsaasumik tunniussiniarnera sivisuupilussuusimammat. Tamannalu sukkanerusumik suliarineqarsinnaanasoraa.
- Inatsisartut Aatsitassat pillugit ataatsimiititaliaat aatsitassarsiornissamik suliniut alla, qinnuteqaatimi qaammatit marluk affarlu suliarineqareernerata kingorna akuerineqartoq pillugu ungasinngitsukkut ilisimatinneqartussaapput.
- Qinnuteqaatit suliarineqartarneri suliamit suliamut assigiinngitsumik pisarput. Pitsaasumik suleqatigiittoqassappat illuatungeriit paaseqatigiilluarsinnaasariaqarput, tamannalu Naalakkersuisut aammalu Tanbreezip ilinniarfigilluarsinnaassavaat, aningaasaqarnermut naalakkersuisoq taama oqarpoq.
Greg Barnes sapaatit-akunnerata tulliani Nuummukassaaq ilaatigut suliap sukkatsisarneqarnissaanut qanoq iliortoqarsinnaanera pillugu Naalakkersuisunik oqaloqatiginnissalluni.
Aamma atuaruk Illersuiniaqatigiiffiit aatsitassarsiornermut inatsisissatut siunnersuut isornartorsiorpaat
