Tanbreezip aatsitassarsiulernissaa, Jens Erik Kirkegaardip nuannaarutigaa isumalluarfigalugulu

Suliffissanik amerlasuunik aamma Nunatta karsiata tamanna aningaasatigut iluaqutigissavaa annertuumik, Aatsitassaqarnermut Naalakkersuisoq, Jens Erik Kirkegaard oqarpoq.

- Naalakkersuisuusimasut uangullu maanna Naalakkersuisuusut sulissutaat maanna timitalereriartuaartoq nunannaarutissaavoq, sualummik aningaasaqarnerput eqqarsaatigalugu aamma nuannaarutissaavoq tamanna suliffissanik amerlagaatsiartunik pilersitsisussaassammat.

Aatsitassaqarnermut Naalakkersuisoq, Jens Erik Kirkegaard nuannaaqisoq oqarpoq.

Tanbreezip aatsitassanik qaqutigoortunik piiaasinnaalernissaa 2016-ip aallartilaarnerani aallartissinnaassasoq naatsorsuutigineqarpoq, tamannalu suliffissanik amerlagaatsiartorsuarnik pilersitsisinnaassalluni.

- Sanaartornerup nalaani inuit 30-niit 140-t tungaannut sulisinneqarnissaat naatsorsuutaavoq. Piiaanerlu aallartippat inuit 80-it sulisorineqarumaartut naatsorsuutigineqarluni. Aatsitassanik qaqutigoortunik piiaanissat ukiuni qulini pissasoq aamma naatsorsuutaavoq kisianni tamassuma sivitsorneqarnissaa periarfissaqarluni.

Naalakkersuisoq isumalluarpoq aatsitassanik piiaanissamik pilersaarut siunissami aningaasatigut iluaqutaajumaartoq.

- Aatsitassaq ukiumut piiarneqartartussat 500.000 tonsit missaaniissasoq naatsorsuutaavoq, tamannalu ukiuni qulini pissasoq aamma naatsorsuutaalluni. Aningaasat ukiumut isertinneqartartussat 1 milliard koruunit missaanniissasut naatsorsuutigaarputtaaq.

1. milliard koruunit Nunatsinnut isertinneqartussat Naalakkersuisup eqqaasai tassaapput suliffeqarfiup akileraaruserneqarneratigut ukiuni qulini Nunatta pissarsiassai, taakku saniatigut sulisut akileraarutaatigut isertitsisoqassallunittaaq.

Jens Erik Kirkegaardillu neriuutigaa aatsitassat piiarneqareernerisigut aatsitassat nunatsinni salinneqareerlutik nunanut allanut tuniniarneqartarnissaat.

- Tamanna nalunarallarpoq aallaavigaarpullu aatsitassanik piiariikkanik suliareqqittarfik Nunatsinniisinneqassasoq, Aatsitassaqarnermut Naalakkersuisoq, Jens Erik Kirkegaard oqarpoq.