Tanbreez Naalakkersuisunut isumaqatigiinniarpoq
Taakku Kujataaniittuni Killavaat Alannguanni 2001-imili misissuisimapput, tamaani nunarsuarmi saffiugassanik qaqutigoortunik annertunerpaanik peqartoq uppernarsarsimallugu.
Tanbreezip Killavaat Alannguat pillugu Aatsitassanut Naalakkersuisoq Andreas Uldum januaarimi ataatsimeeqatigaa.
- Pilersaarummut killiffipput, ilimanaataalu oqaluttuarivavut. Isumaqatigiinniutaasinnaasullu allat, Naalakkersuisunut Kommune Kujallermullu suli isumaqatigiinniutigisavut aamma saqqummiuppavut, aatsitassarsiortitseqatigiiffik taama allappoq.
- Isumaqatigiissuteqarnissarput paaseqatigiinnissarpullu neriuutigaarput, soorlu isumaqartugut neriuutigalugulu Naalakkersuisut 2015-ip ingerlanerani piiaanissamut akuersissummik tuniumaaraatigut.
Tanbreezip maannamut misissuinerminnut 300 millionit koruunit missaat atorsimavai. Aamma ullut arlaanni sulisartut nunaqavissuunerusut 230-t aatsitassarsiorfimmi sulisorilersinnaajumaarlugit naatsorsuutigaa.