Tanbreez kiisami aatsitassarsiorsinnaalissagunarpoq
Aatsitassarsiorfiup Tanbreez Mining Greenlandip, Aatsitassanut Ikummatissanullu Aqutsisoqarfik, qaammatini 18-ini isumaqatiginiarfigereerlugu kiisami qinnuteqaatertik tunniuteqammerpaat.
Taamaalilluni Tanbreez Mining Greenland, Kujataani qaqqami Killavaat Alannguanni aatsitassanik piiaasinnaanissaa qanilliallalluni.
Aatsitassarsiorfiup Tanbreez Mining Greenlandip Naalakkersuisooqatigiit assigiinngitsut marluk isumaqatigiinniarfigisareerlugit kiisami qinnuteqaatertik ullumi tunniuppaat.
- Tanbreez Miningip aatsitassanik piiaaniarnermut qinnuteqaata ullumi tunniupparput. Qaammatit 18-it tamassumunnga atorpavut, tassalu piiaanissarput maanna tusarniarneqaannartussanngorluni, tamannalu nuannaarutigaarput.
Tanbreez Mining Greenlandip allaffissornikkut pisortaa, Bolette Maqe Nielsen oqarpoq.
Qaammatini maanna arlalinngulersuni oqallisaagaatsiarpoq, aatsitassat uranitallit qanoq pineqarsinnaaneri. Tamassumalu oqallisaanerani Tanbreez Mining Greenland oqalliseqataanani tusarnaartuuginnarsimalluni.
Tanbreez Mining Greenlandip piiaaffigisassaani qaqqami, Kujataani Killavaat Alannguanni aatsitassaq piiarneqartussaq tassaavoq aatsitassaq aappaluttoq eudialyt-i. Aatsitassamilu tassaniipput aatsitassat qaqutigoortut, ilaatigut oqarasuaattinut angallattakkanut qarasaasianullu atorneqartartut.
Aatsitassanik qaqutigoortunik piiaanermut atitillugu, Namminersorlutik Oqartussanut isumaqatigiinniarnerit oqitsuinnaasimanngitsut, Bolette Maqe Nielsenip oqaatigaa.
- Aatsitassanut Ikummatissanullu Aqutsisoqarfik Tanbreez-illu akornanni isumaqatigiinniarnerit qaammatini 18-ini ingerlanneqartut oqittuinnaanngillat. Anguniagarput angutserlugu suliaqagaatsiarpugut tassalu maanna isumaqatigiinnerit naammassipput, tamannalu nuannaarutigaarput, Tanbreezip allaffisornikkut pisortaa oqarpoq.
Tanbreez siorna martsimi 2012-imi siullermik qinnuteqaateqaraluarpoq. Taamani qinnuteqaateqarnermi quppersakkat 18-nit, Aatsitassat pillugit Aqutsisoqarfiup pisortaanut, Jørn Skov Nielsenimut tunniunneqarput, tunniussisoralugit sanaartortitsinermik suliffeqarfik, MT Højgaard. Tunniussereernerulli kinguninngua qinnuteqaat allakkatigut tunniussisumut utertinneqarpoq akuersissutitaqanngitsumik.
Tamassumunnga pissutigitinneqarpoq qinnuteqaat taamaallaat Tuluttut allassimammat. Tamatuma kingorna qinnuteqaat kalaallisut nutserneqarluni Aatsitassanut Ikummatissanullu Aqautsisoqarfimmut tunniuteqqinneqarpoq.
Qinnuteqaat avatangiisit pillugit aamma aningaasarsiornerup kingunerisassaanik imaqartut, 19-it missaanniittunik mappersakkanik annertussuseqartut, Bolette Maqe Nielsenip oqaluttuaraa.
Aatsitassarsiorfiup naatsorsuutigaa ukiut arlaqanngitsut qaangiuppata aatsitassarsiorsinnaalersimassallutik.
Akuersissut maanna tusarniarneqartussaavoq, maalaarutit kingusinnerpaamik decembarip aappaa nallertinnagu nassiunneqareersimassapput.
