Tammajuitsussanik pisiniarfik soqutigineqarluartoq

Kalaallit Nunaanni ilaatigut aalisarnerup iluani namminersortutut ukiuni arlalinni inuussutissarsiuteqareerluni Steffen Jensen inuussutissarsiummik nutaamik misiliivoq.

Taassuma oqaatigaa takoriat Kalaallit Nunaat pillugu annertuumik soqutiginnittut.

- Københavnimut takornariarpassuit ulluni makkunani tikerarput. Pisiniarfimmut iseraangamik Kalaallit Nunaat aatsaat paasisaqarfigilersutut ittarpaat, puisit amii qanoq ilillugit pissarsiarisarnerikka aamma Kalaallit Nunaanni puisi qanoq atorluarneqartiginersoq, apersuutigisarpaat. Aamma kalaallit sanalugaat assigiinngitsut sanalunneqarnissaat piinnarlugu taamatut piniarneqartarnersut paaserusuttarpaat, uangalu pisussaavunga takoriat oqaluttuarfigissallugit Kalaallit Nunaanni pissutsit allarluinnaammata, Steffen Jensen oqarpoq.

Kalaallit eqqumiitsulianik sanaluttartut, Danmarkimi najugallit, suleqatigilerniarlugit Steffen Jensen sulissuteqarpoq.

- Kalaallit sanaluttarfiat Qiperoq københavnimiittoq siunissami suleqatigissallugu pilersaarutigaara, Steffen Jensen oqarpoq.