Tammaarsimaafik NEEM tikeraarniarpaat

Qaanaamiit 150-200 kilometerinik kippasitsigisumi sermersuarmi ilisimatuut tammaarsimaarfiat Neem ippoq, taannalu takuniarneqarluni tikinneqassaaq.

Tassani sermersiuut ilisimatuullu 30-t missaanniittut nunani tamalaani 13-ineersut sermersuup naqqata tungaanut qillerillutik ukioq manna aallartipput, aasallu tamasaa 2011-p tungaanut ilisimatuussutikkut misissuissappput.

Avatangiisinut naalakkersuisoq Kim Kielsen, Danmarkimilu silap pissusaanut ministeri Connie Hedegaard aamma Naalagaaffiit Peqatigiit Klima pillugu ataatsimiittartoqatigiivisa Præsidentia Rajendra K. Pachauri sermersuarmi ilisimatusartunut tikeraassapput, taakku saniatigut Danmarkimi Canadamiillu pinngortitaq pillugu ilisimatusarfinneersunit angalaqataasoqassaaq. Angalanerlu New York Timesimiit New York Magazinemiit India Today-miillu tusagassiortunit malinnaavigineqassaaq.

Sermersuarmi qillerinermi ukiut 115.000 sinnerlugit matuma siorna klimap kiannerata nalaani paasissutissanik katersuisoqarpoq. Paasisallu aallaavigalugit siunissami klimap kissatsikkiartuinnartup qanoq ingerlajumaarnissaanik takussutissanik katersuisoqarluni.