Tamatta pinngitsoqarata atorfissaqartsinneqarpugut.
Namminersulernistsinnit ukiup ataatsiop qaangiunnera Jess Svaneip oqalugiarnermini ilaatigut ima eqqaavaa:
- Namminersulernitsinniit periarfissarpassuit ammaanneqarput. Nunatta innuttani pinngitsoqarnagit tamaasa atorfissaqartippai, Jess Svane ilaatigut taama oqarpoq, nangillunilu oqarpoq:
- Mingutsitsineq aatsitassaniit taamaallaat pineq ajorpoq. Ulluinnarni inuiattut tulluusimaaruterput minguttitaraarput. Motor-it uulialersimallugit puui immamut igittarpagut, asimi aallaarsimaarfinnut aliannaarsaarfinnullu eqqagassat qimattarpagut. Inoqarfinni ukioq naallugu puukunik eqqagassanillu allanik maanngaannaq ilioraallutalu eqqaasarpugut.
Oqalugiarnermini aamma eqqaavai Qeqertarsuup avataani uuliasiorluni misiliilluni qillerinissat.
- Ukiuni kingullerni aatsitassarsiornikkut, uuliasiornikkut inuutissarsiornikkullu nunatsinni periarfissarpassuit saqqummeralersimapput. Tamakkualu pissutigalugit nunatta avataaniit pilerigineqarnera annertusigaluttuinnarpoq.
Inuiaqatigiit akuunitsigut ajunngitsorsiassat angusinnaasat pissarsiarineqassappat iluaqutigineqassappatalu isiginnaartuuginnarneq pinngitsoortissagutsigu immitsinnut annertoorsuarmik pisussaaffilertariaqarpugut, ilaatigut Jess Svane taama oqalugiarpoq.
Qeqqata Kommuneani meeqqat titartaasimapput, takorloorlugu ukiut 20-t qaangiuppata Maniitsoq aamma Sisimiut qanoq isikkoqassanersut.
Maniitsumi meeqqat isumalluarput ukiut 20-t qaangiuppata naluttarfeqalissallutik, sisimiormiuaqqat guldinik nassaartoqarnissaa kissaatigiasimavaat.
Titartakkat taakku marluk katersugaasivimmut toqqorneqassasut aalajangerneqarpoq, ukiut 20-t qaanguppata takuteqqinneqassallutik, taamanissamut suummita eqquussimassappat?
