Ilisimatuut: Tamataqanngitsunik assit internettimiittut peeruminaapput

Assit nittartakkaniilereeraangata peersinneqarnissaat ajornangajaavittarpoq, ilisimatuut marluk KNR-imut oqarput.

Kalaallit arnat niviarsiaqqallu nunat assigiinngitsut akornanni nittartakkatigut sianiginngisaannik akuerinngisaannillu nittartakkamut pornomut tunngasunut nittarsaatitut saqqummiunniunneqarsimasut, KNR-ip sisamanngornermi saqqummersippaa.

Assillu nittartakkatigut taama saqqummiunneqareersimatillugit iliuuserisinnaasat annikitsuararsuusut, qarasaasiatigut isumaatsuunermut siunnersuisoqatigiit siulittaasuata Rasmus Theedep oqaatigaa.

- Assit saqqummiunneqareersimagaanngata peersinniarnissaat ajornakusoortorujussuusinnaavoq, Rasmus Theede oqarpoq.

Qarasaasiatigut attaveqatigiittarfinnut tunngasumik Ilisimatusarfimmi ilisimatusartoq Rosannguaq Rossen aamma taama naliliivoq.

- Assit nittartakkamut ikkunneqaraangamik qaqugumorsuaq tassaniittussaasarput, Rosannguaq Rossen oqarpoq.

AAMMA ATUARUK Arnat kalaallit pornomik nittartakkami saqqummersinneqartut

Akuerinngisamik assit nittartakkamut ikkunneqarsimasut paasigaanni politiinut saaffiginnittarnissaq Rasmus Theedep innersuussutigaa.

Nittartakkamik ingerlatsisut aamma saaffigineqarsinnaapput. Ajornartorsiutaasulli aaqqiivigineqarnissaa neriuuteqarfigineqarsinnaavallaanngilaq.

- Nittartagaq una inuussutissarsiutigalugu ingerlanneqarpat, periarfissat annikitsuararsuupput, Rasmus Theede oqarpoq.

Rasmus Theedep innersuussutigaa, arnat inuusuttut nammineq assimminnik nassiussigaangamik mianersortassasut.

- Eqqugaasup nammineq pisuussutigineratut nipeqassanngilaq. Kisianni piviusorsiussaagut (…) oqartarpugut, internetti puiunngisaannartoq. Taamaammat assinik taama ittunik nassiussiunermi mianersortoqassaaq, sukkasoorujussuarmimmi siammarterneqarsinnaapput, qarasaasiatigut isumannaatsuunermut siunnersuisoqatigiivini siulittaasoq Rasmus Theede oqarpoq.

 

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl