Tamarmik pikkorissarsinnaapput

Assigiinngisitsineq. Taama nipilimmik aalisartut nunaqarfimmiut pikkorissarnermut peqataatinneqannginnerat, Qaarsuni aalisartut piniartullu peqatigiiffiannit  isornartorsiorneqarpoq. Tassami Qaasuitsup Kommuniata aalisarunnaarnermi eqqorneqartunut pikkorissarnissamut neqeroorutai illoqarfimmiunuinnaq atuuttussatut nalunaarutigineqarsimammata.

Tamannali kukkuluttornerusoq borgmester Jess Svanep nassuerutigaa.

-Ajuusaarutigivara allaffimmi sulinermi ajuusaarnartumik oqariartortoqarsimanera. Isumaqarpunga taanna paatsooqatigiinnerusoq. Inuit unerarallarfiini tamanut neqeroorutaalluni suliaanikuuvoq, Qaasuitsup Kommuniani borgmesteri, Jess Svane oqarpoq.

Qaasuitsup Kommuniata aalisarnerup unitsinneqarallarnerani ikiueqqaarneq, vhf-radiolerineq, inuttut ineriartorneq kiisalu aatsitassarsiornermut atatillugu tuluttut pikkorissarnerit Upernavimmi, Uummannami aamma Ilulissani novembarimiit decembari ilanngullugu neqeroorutigivai.

Borgmester Jess Svanellu nassuerutigaa pikkorissartitsinissamik suliniuteqarnerup pilertortumik pilersaarusiorneqarnera ajornaatsuinnaasimanngitsoq.

-Inuit pikkorissaanermut ingerlatsisussagut sukkasoorujussuarmik pissarsiariniarsaralutigit pissarsiarinikuuagut. Piffissaq taama sivikitsigisoq siammasittorujussuarmik aaqqissuussiniarneq ajornakusoorsimavoq, Jess Svane oqarpoq.

Uummannami, Upernavimmi aamma Ilulissani aalisakkanik suliffissuarmi sulisut 281-it qaleralinniarunnaarnerup kinguneranik suliffissaarukkallarput.

Taakkua saniatigut Upernavimmi aalisartoq ataaseq, Uummannami aalisartut qulit Ilulissanilu aalisartut 23-it qaleralittassaarunnerup kinguneranik suliffissarsiortutut saaffiginnissimapput.