Tamarmik isumaqatigiipput akisussaasoqarumanngilarli
Meeqqat oqaaseqartartuat kiisalu Inuit pisinnaatitaaffiinut siunnersuisooqatigiit siulittaasuata tullia, Aaja Chemnitz Larsen, oqallinnermut akuliuppoq.
- Aningaasat aporfiginagit kommunet Namminersorlutillu Oqartussat aaqqiissuteqarnissaat pisariaqartipparput – aamma siunissaq qaninnerusoq eqqarsaatigalugu, Aaja Chemnitz Larsen isumaqarpoq.
Atorfinnut qinnuteqartoqarsimannginnera pissaanermik atuinissamut atatillugu inatsisitigut tunngavissaaleqineq pissutaasutut nassuiaatigineqartarput, maannakkulli ukioq ataaseq taamatut ingerlasoqareerluni. Kingullermik IA-meersup Nikoline Ziemerip pissutsit Inuit pisinnaatitaaffiinut siunnersuisooqatigiinnut suliassanngortippai.
-Ajornartorsiutip paasilluarnissaanut inunnik isumaginninnermut tunngasortaasa pinerlussimanermut tunngasortaannut taputartuuttariaqarput. Inuusuttut akornanni peqqarniitsuliortarnerit amerlaqisut takusarpagut, tamannalu isumakulunnartoqarpoq. Pinerluutigineqartut qanoq ittuuneri apeqqutaatillugit eqqartuussivik pinerluuteqarsimasunut inissiivimmut inissiisariaqartarpoq, pinerluutigineqaartulli qanoq peqqarniitsiginera pineqaatissiissutaasumut naleqqussarneqartariaqarpoq. Isumaqarpunga pinerluutinut naleqquttunik pineqaatissiisariaqartugut. Meeqqat inuusuttut pineqartut siusinnerusukkut inuiaqatigiittut ikorfartorsinnaagutsigit, siunissaq ungasinnerusoq eqqarsaatigalugu pitsaasumik sunniuteqarsinnaanissarput qularutiginngilara, Aaja Chemnitz Larsen nassuiaavoq, immikkullu isumannaallisakkanik inuusuttunut naleqquttumik inissiivissiinissaat, kommunenut Namminersorlutillu Oqartussanut kaammatuutigalugu.