Tamarmik 1000 koruuninik qaffaavigineqanngillat

Hansigne Kristiansenip Nuummi najugallip, soraarnerusutisiami tungaviusup, juulip aallaqqaataani akileraarutit akilertinnagit 1000 koruunimik qaffasimanissaa naatsorsuutigigaluarpaa. Inatsisartummi upernaaq ataatsimiikkamik taama aalajangerput. Kisianni taama pisoqanngilaq.

Hansigne Kristiansenip siusinaartumik pensionisiai ukiuni arlalinni qaammammut 5551 koruuniusarput. Pensionisiai tunngaviusut juulip aallaqqaataani qaffakkaluarput, kisianni taamaallaat 789 koruuninik, taamaalillutik tigusassai 6250 koruuniullutik.

- Tapi taana iluaqutaanerusuugaluarpat akiligassatsinnut artorsartassanngikkaluarpugut. Tigusigaangatta akiligassanut tamarmik nunguttarput. Eqeersimaarlutik suliarisariaqaraluarpaat pinngitsoorani, taanna qaffaaffigineqarnerput tamaat ikkullugu, Hansigne Kristiansen oqarpoq.

Allanik isertitaqaraanni siusinaartumik pensionisiat angissusaat iluarsineqartarput. Pensionisiavit saniatigut ukiumut 28.000 koruunit sinnerlugit saniatigut isertitaqaruit, taava pensionisiatit akileraarutinik akiliinnginninni 1000 koruuninik qaffassanngillat.

Isumaginninnermut Naalakkersuisoqarfimmi immikkoortoqarfimmi pisortaq Kirsten Olesen taama nassuiaavoq:

- Maannamut imaappoq, saniatigut ukiumut 28000 koruunit sinnerlugit isertitaqarsimagaanni, taava siusinaartumik pensionisiat millisarneqartarput. Taavalu soorunami aamma tamanna isumaqarpoq, qaffaatit 1000 koruunit tamaasa issanngikkaat, ikinnerusunilli qaffaaffigineqassasut. Kisiannimi siusinnerusumut naleqqiullugit amerleriaatapput.

Isumaqaruit, siusinaartumik pensionisiavit tunngaviusut angissusaat mikivallaartut, taava kommunivit isumaginninnermut allaffianut saaffiginnissinnaavutit.

Siusinaartumik pensionisiallit amerlanerpaartaat pensionisiamik saniatigut isertitaqanngillat. 2008-mi misissuisoqarmat tamanna paasineqarpoq.