Tamanik iluarsiissutissat aajuku

Tuttut, umimmaat aqissillu. Kalaaliminernik nerinerulerutta, avatangisinut aningaasaqarnitsinnut peqqinnitsinnullu iluaqutaassaaq.

- Peqqinnissatsinnut iluaqutaassaaq. Silap pissusianut iluaqutaassaaq. Aningaasarsiornitsinnut iluaqutaassaaq. Ila sukkut ajoqutaassanersoq takusinnaanngilara, ph. d-mik angusaqarluni ilisimatooq nakorsarlu Henning Sloth Pedersen ataatsimeersuartunut ualimut oqarpoq.

Nunatsinni nerisatta 80-90 procentii nunani allani pisiarineqartarput. Henning Sloth Pedersen isumaqarpoq, inuiaqatigiit taamannak pissuteqarnermikkut imminut assortortut.

Nerisassat nunatsinnut umiarsuarnik assartorneri CO2-mik aniatitsinerunermik kinguneqartarpoq.

Aamma nersussuup neqaanik nerisaqarneq immini CO2-mik aniatitsinerunermik kinguneqartarpoq, nersussuit uumatinneri nukimmik pisariaqartitsinermik kinguneqartarmat, neqillu suliarinerani aamma nukimmik pisariaqartitsisoqartarluni.

Aamma tuttut umimmaallu neqaat aqissillu nerisassanit nunani allaneersunit peqqinnarnerupput.

Aalisarnermut, piniarnermut, nunalerinermullu naaalakkersuisoq Ane Hansen KNR-imut marsimi oqarpoq, aalisartut piniartullu aningaasarsiornerat taperserniarlugu, pisortat suliffeqarfiutaani nerisassat sassaalliutigineqartut affaat nunatsinneesuunissaat anguniarniarlugu.

Tassalu Namminersorlutik Oqartussat kantiinaani, kommunit allaffiini, meeqqerivinnilu nerisassat sassaalliutigineqartut nunatsinneersuussasut, Ane Hansen isumaqarpoq.

Tamannalu Henning Sloth Pedersenip tapersersorpaa:

- Taamaaliartussappat ajunngissaqaaq. Kisianni tamatta ataasiakkaarluta pisiniarfiliaraangatta eqqarsaqqilaartarnissarput pitsaanerpaassaaq, nakorsaq oqarpoq.

Kisianni meerartagut piseqqusaarutinit sarsuatsitsiffigineqartuarput. Taava qanoq iliornikkut ileqqut allangortinneqassappat?

- Oqaluuserisarlugit. Aamma tamatta eqqarsaatiginerusariaqarparput, inuaqatigiinnguugatta ikittuinnarnik inuttallit. Namminersornermi imaanngilaq kaangarfigisaq ilaaginnassallugu. Maannakkummi ilaarsiinnarpallaaqaagut, Henning Sloth Pedersen oqarpoq.

Taaassuma aamma erseqqissarpaa, pingaarluinnarmat, inuit qulaanniit oqaluunneqannginnissaat.