Tamangajammik taarserneqarput

Siulersuisoq Gert B.Lynge paarlallugu Vagn Andersen siulersuisunngorpoq.

Vagn Andersen KNI-mi Inuit Service Companymilu siulersuisunut ilaasortaareerpoq.

Liisi Egede Hegelund kisiartaalluni siulersuisuni ilaasortatut qinigaaqqippoq. Ilaasortat tallimaasaraluartut pingasuinnanngortinneqartut, Sermitsiaq.gl-imi allaaserineqarpoq.

Namminersorlutik Oqartussat suliffeqarfiutaanni siulersuisunut ilaasortaasartut ikilisinneqarnerat assigalugu Greenland Venturemi suliffissanik pilersitsiniarnermi aningaasaliisarfiup siulersuisuni ilaasortat taamaasillutik ikilisinneqarput.

Siulersuisunut ilaasortat inuttalerneqarnerannut atatillugu Greenland Venturep, Greenland Developmentip Kalaallit Nunaannilu takornariaqarnermut inuussutissarsiornermullu siunnersuisoqatigiit ataatsimuulernissaat, Namminersorlutik Oqartussat aamma piareersarlugu pilersaarutigaat.

Greenland Developmentimi siulersuisuni siulittaasoq, Steen Montgomery-Andersen Greenland Venturemi siulersuisuni nutaatut aamma ilaasortanngorpoq.