Tamakkiisuusumik raajartassiissutaasartut allannguuteqanngillat

Biologit aalajangiissagaluarunik, nunatta imartaani raajat ikinnerusut pisarineqarnissaat orniginerugaluarpaat. 110.000 tonsit ikinnerusulluunniit pisarineqarnissaat biologit innersuussutigigaluarpaat.

Taamaakkaluartoq 2009-mi tamakkiisuusumik pisassiissutaasut aamma aappaagu pisassiissutaassasut Naalakkersuisunit toqqarneqarpoq. Taamaalilluni nunatta kitaani 114.500 tonsit aamma tunumi 12.400 tonsit aalisarneqarsinnaassapput.

Raajarniarnerup nakkutilliivigineqarnera pillugu nalunaarutip nutarterneqartussaanera Naalakkersuisunit innersuussutigineqarpoq. 114.500 tonsinit 4.000 tonsit EU-mit pisarineqartussaapput. Sinneruttunit 57 procentit avataasiortunit pisarineqassapput 43 procentillu sinerissamut qanittumi aalisartunit pisarineqassallutik.