Tamaat isigalugu: Nunatsinni akiuussutissalersuineq uunga killippoq
Issittumi Sakkutooqarfiup umiarsuaa alapernaarsuut coronamut akiuussutissanik useqarluni nunatta kujataanut Paamiunut Qeqertarsuatsiaanullu sapaatip akunnerata siuliani angalavoq.
Qaqortumi sapaatip akunnerata siuliani kapuisoqarpoq.
Akiuussusersuineq nunatta ilarujussuanut ingerlaartinneqarpoq, qanorli annertugisumut killippugut?
Akiuussutissamik kapitikkusuttut tamarmik qaqugu kapitissimassappat?
Akiuussutissat nutaat qaqugu tikissappat?
Qanoq amerlatigisut akiuussutisserneqarusunngillat?
KNR-ip nakorsaaneq, Henrik L. Hansen tamakkuninnga apeqquteqarfigaa.
Qeqertarsuatsiaat umiarsuarmit alapernaarsummiit, Knud Rasmussenimit isigalugu. Assi: Issittumi Sakkutooqarfik
Qanoq amerlatigisut akiuussutisserneqareerpat?
Nunatsinni innuttaasut 3.927-t coronamut akiuussutissamik siullermeertumik kapineqareerput. Taakku innuttaasut 6,9 procenteraat.
Tamatumali agguarnera qaffasinnerungaatsiassaaq. 16-ileereersimasummi kisimik akiuussutissamik kapineqarsinnaapput.
Innuttaasut 16-inik amerlanerusunillu ukioqartut katillugit 43.907-iupput. Taakkunannga 8,9 procentit kapineqareerput.
Danmarkimi innuttaasut 6,2 procentii kapineqareerput.
Sumi kapuisoqareerpa?
Nuuk, Sisimiut, Ilulissat, Qaqortoq, Paamiut, Qeqertarsuatsiaat aamma Aasiaat.
Tulliani sumi kapuisoqassava?
Marloriarluni kapitittoqartartussaavoq, taamaammat tulliani kapiteqqittoqarnissaa pilersaarutaavoq.
Taamaammat Sisimiuni, Ilulissani, Paamiuni Qeqertarsuatsiaanilu kapuisoqaqqissaaq. Tamatuma saniatigut illoqarfinni taakkunani 65-ileereersimasut tamarmik kapitinnissamik neqeroorfigineqassapput.
Marsilli qaammatuunut pilersaarutit suli erseqqarivinngillat:
Akiuussutissammi qanoq ittut pissarsiarineqarnersut tassunga apeqqutaavoq.
- Isorliunerusuni suliaqartoqarsinnaanissaanut akiuussutissat maannakkumit pissarsiarisatsinnit tassa Pfizer/BioNtechimeersunit allaanerusut pissarsiarinissaat pisariaqarpoq, Henrik L. Hansen oqarpoq.
- Danskit peqqinnissamut aqutsisoqarfiat akiuussutissanik sumiiffinnut akiuussutissamik tikisitsiniarnerup ajornarfianut naleqquttunik tunniussinissaq pillugu oqaloqatigineqarpoq.
Pfizer-Biontechimit akiuussutissat. Assi: Issittumi Sakkutooqarfik
Akiuussutissap Pfizer/BioNtechimeersup nalinginnaanngitsumik tassa 80-imik nillissuseqartumiitsinneqarnissaata pisariaqarnera matumani ajornartorsiutaavoq.
Akiuussutissaq nunatsinnut tulliulluni tikiunneqartussaq Modernameersuussagunarpoq. Tamanna qulakkiivinneqanngilaq, piumasarineqarporli.
Taassuma taamaallaat 20-nik nillissuseqartumiinnissaa pisariaqarpoq, akiuussutissarlu akuleruteqqaartariaqarani.
Pfizer/BioNtechimeersoq taamaaliortussaavoq.
Qerititsivik akiuussutissanik imaqartoq nillertorujussuuvoq. Assi: Issittumi Sakkutooqarfik
Taamaammat Modernamit akiuussutissap atornissaa ajornaannerujussuussaaq.
- Tusagassiuutit assigiinngitsut naapertorlugu Pfizer/BioNtechimut piumasaqaatit allanngortinneqarnissaat qinnutigineqarpoq, taamaalilluni 20-nik nillertigisumiissinnaalersinneqassalluni. Ullulli 14-iinnaat periarfissaassammata uagutsinnut unammillernartumut aaqqiissutaasinnaanngilaq, Henrik L. Hansen oqarpoq.
- AstraZenicamit akiuussutissaq utoqqarnut atorneqarnissamut akuerisaanngilaq. Taamaammat Modernamit akiuussutissaq pisariaqartitatsinnut kisiartaalluni naammassinnissinnaavoq.
Akiuussutissamik kapitinnissamik kissaateqartut tamarmik qaqugu kapitereersimassappat, imaluunniit qaqugu siullermik kapitissimassappat?
Inuiattut Ullorsiornermi juunip ulluisa 21-ianni.
Qanoq amerlatigisut naammassillugit akiuussutisserneqareerpat?
Nunatsinniittut 1.203-upput.
Qanoq amerlatigisut kapitinnissamut qujaannarpat?
Nalunaarsorneqanngilaq. Akiuussutissamik kapitinnissamut neqeroorfigineqarsimasut sooq takkussimannginnersut ilisimanngilarput. Neqeroorfigineqarsimasunit tallimaangaata sisamat missaat siullermeertumik kapitikkiartortarput. Taakku kingusinnerusukkut nalunaarsorluarumaarpagut, Henrik L. Hansen oqarpoq.
Fryser med vacciner fra Pfizer-Biontech på inspektionsskibet Knud Rasmussen. Foto: Arktisk Kommando
