Tallimararterutaat imerajuttuusarsimapput

Inersimasut Danmarkimi najugallit tallimaagaangata ataatsip angajoqqaavi imerajuttuusarsimapput. Siunnersuisoqarfik TUBA, meeqqat imerajuttunik angajoqqaalinnik misissuisitsisimavoq, inernerillu saqqummiunneqaqqammerlutik.
Allattoq Mads Lynge
februaarip 16-at 2008 13:35

Inersimasut 20-t 40-llu akornanni ukiullit 1000-it misissuinermi apersorneqarsimapput, angajoqqaajusullu tallimararterutaat imerajuttuusimasut paasineqarluni.

Angajoqqaajusut qanoq imertigisarsimanersut misissuinermi apeqqutigineqartarsimanngilaq, angajoqqaalli aalakoornartutortarnerat ajornartorsiutaasarsimanersoq apeqqutigineqartarsimalluni, misissuinermik aqutsisoq Jesper K. Larsen Danmarks Radiomut oqarpoq.

Meeqqat 60.000-it missaanniittut imerajuttunik angajoqqaaqartut, Danmarkimi Peqqinnissakkut Qullersaqarfiup kisitsisaataani atuarneqarsinnaavoq.

Imerajuttuunertik pissutigalugu napparsimmavinni uninngatinneqartarsimasut tunngavigalugit kisitsisit katersorneqarsimaput.