Tallimanngorpat seqineq pulassaaq

Kalaallit Nunaata avannarpiaani – tassa Qaanaap avannaani – seqineq tamakkerluni pulassaaq –pulanerata 70 procentia Sisimiuni – 60 procentia Nuummi – Kujataanilu pulanerata 50 procentia takuneqarsinnaassalluni.

Kalaallit Nunaanni sumiikkaluaraanniluunniit seqernup pulanera isiginnaarusukkaanni seqinersiutinik immikkut tulluarsakkanik isiginnaaruteqarnissaq pisariaqarluinnarpoq, tassa seqinersiutit nalinginnaasut imaluunniit igalaamineq paatersimasoq atorsinnaanngillat, seqinerli toqqarlugu isiginnaarutinik immikkut sanaanik isiginnaaruteqartariaqarpoq.

Isiginnaarutaasinnaasut 10.000-it illoqarfinnut nunaqarfinnullu nassiussuunneqarnikuupput, taakkualu minnerunngitsumik meeqqanut akeqanngitsumik agguaanneqassapput. Ullaaq manna suli isiginnaarutissannik pisimanngikkuit atuarfimmut kommunilluunniit allaffianut aallersinnaavutit, tassani agguaassinngippata sumi pissarsiarineqarsinnaanersut paasisinnaassavat.

Seqernup pulaneranut isiginnaarutit 10.000-it akeqanngitsumik agguaassassanngorlugit, kalaallisut qallunaatullu ilitsersuutitalerlugit Danmarkimit nassiunneqarput.

Seqineq tallimanngorpat ullaakkut nalunaaqutaq arfineq qaangilaarpagu pulajartulissaaq, arfineq marluk eqqaani pulanerpaaffimmineeriarluni, nalunaaqutaq arfineq pingasut qaangilaarnerani pulajunnaassalluni.

Neriuinnarsinnaavugut tallimanngorpat ullaakkut nuiassanngitsoq.