Tallimanngorneq 13-iat qangaanilli ajutoorfiusarsimaqaaq

Ullumikkut tallimanngorneq maajip 13-eraat. Ullorlu manna tallimanngorneq 13-iat, upperisaqarniartartuni mianersorfissatut isiginiarneqartarpoq.

Ullumikkut tallimanngorneq maajip 13-iat, sila taqqama sialussuarpoq, suna tamarmi kuuppoq sakkortuumillu anoraasuasarluni. Namminersornerullutik Oqartussat qarasaasiaqarfiata ilaa qarsutsiffiummat Namminersornerullutik Oqartussat internettikkut nittartagaat ullumikkut iserfigineqarsinnaajunnaaraluarpoq.

Tallimanngorneq 13-iat nunani killiunerusuni ajunaarnerup ulluatut isiginiarneqartarpoq, oqaatiginiarneqartarporlumi ajutoornerit tallimanngornermi 13-ianni amerlanerusartut.

Tallimanngornerup 13-iata nunatsinni ajunaarnerup ulluatut isiginiarneqartarnera avataanit eqqussanut allanut ilanngulluni nutaajuvoq. Nunani avannarlerni upperineqarnera ukiunik 200-nik pisoqaassuseqartoq ilisimatuunit oqaatigineqartarpoq.

Tallimanngornerup 13-iata ajunaarnerup ulluatut isigineqartarnera kangiani qiterlermi qangarsuaq juutit aqqutigalugit pilersimassangatinneqartarpoq. Qanga kangiani qiterlermi toqumut pillakkat tallimanngornermi toqutaasarput, soorlu Jesusi tallimanngornermi tannaartumi kikiattugaallunilu toquvoq.

Taava kisitsit 13, ajunaarnerup kisitsisaatut isigineqartartoq, Biibilimit aamma aallaaveqartinneqartarpoq. Tassa Jesusi toqutaanissi sioqqullugu ajoqersukkaminik nerliiviliartitsimmat nerrivik kaajallallugu issiasut 13-iusimapput.

Tallimanngornermi 13-ianni ajunaarnerit ilumut amerlanerusarnersut uppernarsiniarlugu Tuluit ilisimatuui 1993-imi naatsorsuisimapput. Aqqusinerni biilinik angallattut ukiut arlallit ingerlaneranni ajutoortarneri naatsorsorsimavaat paasisimallugulumi ajutoortartartut 52 procentii tallimanngornermi 13-ianni ajutoortarsimasut.

Ullumikkorpiarlu ajutoortoqarpoq tassa Danmarkimi umiarsuaq assartuut ”Munzu” Øresundimi qeqertaliamut Peberholmimut unnuaq aporsimavoq sunaaffa umiarsuup naalagaa aqutsilluni sinilertoorsimasoq. Ajutoornermi qujanartumik ajoqusertoqarsimanngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat