Qulaarpaa - Tallimanik ukioqarlunga kinguaassiutitigut atornerlunneqaqqaarpunga

Qulaarpaa maajip ulluisa arfineq-aappaanni aallakaatinneqartussamut atatillugu, tv-kkut nittartakkakkullu inunnik apersorsinnaassatsinnik ujarlerpugut. Inunnik apersugassatsinnik ujarlernitsinni Pilutannguaq Th. Petersenip 29-nik ukiullip meeraanermini misigisimasaminik allaffigaatigut.
Assi © : Pilutannguaq Th. Petersen/KNR
maajip 05-at 2015 11:50

Pilutannguaq Th. Petersennip ima allaffigaatigut, tassani neriuutigalugu inuit kinguaasiutitigut atornerlunneqarsimasut ammanerulernissaat anguniarlugu misigisaminik avitseqatigerusulluta:

Meeraallunga 5-6-7-nik ukioqarlunga kinguaassiutitigut atornerlunneqarnikuuvunga atoqatigineqarlunga. Ukiut 7-8-t isertornikuuvunga, 14-nik ukioqarlunga aatsaat pisimasoq anaanannut ilaquttannullu oqaluttuarinikuullugu.

Oqaluttuarnerma kingorna pisimasoq anaanama politiinut unnerluutigaa angullu uannut atornerluisimasoq eqqartuussaavoq, nassuerlunilu atornerluttarnikuullunga.

Oqaluttuarnerma kingorna anaanaga Qaqiffimmi katsorsartinnikuuvoq, pisimasoq pillugu ikiorusukkaminga, namminerlu nukissaqarusulluni. Uanga nammineerlunga marloriarlunga familiebehandlingertinnikuuvunga, 22-nik 27-nillu ukioqarlunga tarnip pissusaanik ilisimasalimmik ukiup affaanik sivisussuseqartunik oqaloqateqartalerlunga. Taamatullu Tasiortap ataani aamma katsorsartinnikuullunga.

Imminut suliarinerpassuit uanni pinikuupput taamaattorli atornerlugaasimanera suli qaangernikuunngilara. Kamaqartaqaanga, ersiorfeqartaqaanga aliasuffeqartaqalungalu. Taamanikkullu meeraasimaqigama ullut ilaanneqartarnikuuvunga qereqqasutut pujorsuullu iluaniittutut misigisimasarlunga.

Atornerlunneqarnerma kingorna maajutuunngorpunga, ullormut arlaleriarlunga uffartarlunga, assakka erroqattaartalugit, errortangaarama allaat assakka amerluttunngorlutik. Katsorsartittarninni tamakku aningornissaannut  aqqutissiunneqartarpunga, sulilu qaangiiniarlunga.

Upernassariartoraangat silalu taartaleraanngat misigissutsikkut ilungersortarnera suli qaangivinnikuunngilara, kamak aliasunnerlu suli takkuttarput, qujanartumillu katsorsartittarsimanera iluaqutigalugu kamak sakkukilliartortoq malugivara.

Isumakkeerfiginninissap tungaanut aqqut takeqaaq. Uannulli asanissara uannullu upperinissara tatiginissaralu pingaartittarpara, naak ilaanni tamanna inornartunngorsinnaasaraluartoq.

- - -

Pilutannguaq uinilu marlunnik erneqarput, pingajussaanillu meerartaartussaallutik. Pilutannguaq socialhjælperisut ilinniarsimasuuvoq, ilaquttanilu maanna Ilulissani najugaqarlutik.