Tallimaannarnik ukiulik arpaqataalersoq
Nukappiaraq tallimaannarnik ukiulik 500 kilomiiterinik ungasitsigisumut pisunnissarsuarmut peqataassasoq, sungiusaasua nalunaarsimavoq, politiken.dk allappoq.
Nukappiaraq arpatsinneqarniartoq ateqarpoq Budhia, aatsaallu siullerpaamik taama sakkortutigisumik sungiusaasuata arpaqataatilinngilaa.
Ukioq kingulleq, nukappiaraq taanna 70 kilomiiterinik ungasitsigisumut arpatsitsinermut peqataatinneqarpoq, nukappiaqqallu ukioq kingulleq arpaqataanermini timaa naalliuppallaarluni, nakorsat naliliimmata inuunera navianartorsiulersoq, Budhia 65 kilomiiterit missaannik ungasitsigisumut arpareerluni unitsinneqarpoq.
Pisunnissarsuaq ulluni aqqanilinni ingerlanneqassaaq, Indiamili pisortat pisutsitsinissamut nukappiaqqap peqataanissaa itigartissimavaat. Pisortat isumaqarput, taama ungasitsigisumut nukappiaraq pisutsinneqassappat, naalliutsitsinertut nalilerneqassasoq, nukappiaqqallu peqqissusaa navianartorsiulissasoq.
Budhiap sungiusaasua ulluinnarnilu perorsaasua kamassimaqisoq allaaserineqarpoq, taanna aamma oqarpoq, nukappiaqqamut pitsaanerpaaq anguniarlugu taama piniaraluarluni.
Budhia inoorlaajusorli angutaa toqusimavoq, pingasunillu ukioqartoq arnaata paarisinnaajunnaarmagu, sungiusaasup nukappiaraq perorsarniarlugu tigusimavaa.
