Talibanit siuttuat toqutaasimagunarpoq

Pakistanimi sakkutuut isumannaallisaaniaqatiigiit nuimasut ullumi oqaatigaat, Mehsud, nulia paarsisuilu arlallit ippassaq toqutaasimasut, amerikamiut inuttaqanngitsoq timmisartuaraq atorlugu qaartartunik marlunnik Mehsudip Sydwaziristanimi naalagaaffianut igeriussimmata.

Pakistanimi nunami namminermi pissutsinut ministeri Rehman Malik, Mehsudip toqutaasimaneranik uppernarsaarusunngilaq, ilimagaluguli Medsud toqutaasunut ilaasimassasoq.

Allaammi ilisaareersimasoq oqaatigineqarpoq.

Taliban imaluunniit USA apeqqummut atatillugu aamma oqaaseqarusunngillat.

Mehsud ilumut toqutaasimassappat, tamanna Talibanimut kinguariarnerussaaq angisooq. Talibanikkummi Pakistanip nunatut saniliani Afghanistanimi nunat killiit sakkutuuinut sorsummata. Toqutaasimappalli Pakistanimut USA-mullu tamanna ajugaanerussaaq, Mehsudimi ulorianartutut isigalugu ajoqutaajunnaarsitsisussamut 5 millioni dollarinik - koruuninngorlugit 26 millioninik akiliiumareerput.

Baitullah Mehsud 2007-mili Pakistanimi Talibaninut imminnut siuttunngortippoq. Pakistanillu avannaata kitaani sorsuttartoqatigiinnik 13-iussangatinneqartunik pilersitsisimalluni. Taakku sorsuttartoqatigiit oqartussat peqqussutaannut tusaajumasimanngivipput. Allaammi oqaatigineqarpoq Mehsud sakkutuussaminik 10.000-it 20.000-illu akornanniittunik ukiuni kingullerni pilersitsisimassasoq.

Mehsudip siuttuuffigisaanik Pakistanimi Talibanit qaartartumeerinerini inuit 2.000-t missaanniittut ukiuni kingullerni marlunni inuartarineqarsimapput.

Pakistanip USA-llu oqartussaasa Mehsud Pakistanimi ministeriunerusimasumik Benazir Bhutto-mik decembari 2007-imi inuartarinnissimasutut pasivaat.