Talibanit siuttuat toqunerarneqarpoq
Pakistanimi isumannaallisaanikkut officeri oqarpoq, Mehsud, taassuma nulia paarsisullu arlallit toqutaasut, amerikamiut timmisartuannit aquttoqanngitsumit saassunneqarluni toqutaasup najugaqarfiani Waziristanip kujataaniittumi.
Talibanilli USA-luunniit apeqqut pillugu ullumikkut oqaaseqarumanngillat.
Mehsudip toqutaaneragaanera Talibaninut akiniaaneruvoq, tamannalu Pakistanimit USA-millu assut nuannaarutigineqarluni, angutimmi taassuma toqutaanissaanut 5 millioni dollarsit - tassa 26 millionit koruuningajaat - akissarsiassaritinneqassasut neriorsuisimammata.
Mehsud 2007-ip naalernerani Pakistanimi Talibaninut siuttutut imminut suaarutigaaq. 10.000-it 20.000-illu akornanni sakkutooqassasutut naatsorsuutigineqartarpoq, taassuma siuttuunerani inuit 2.000-it missaanniittut Pakistanimi ukiuni kingullerni Talibaninit qaartartumeerinikkut toqunneqarsimallutik.
Aammattaaq Pakistanip USA-llu Mehsud siornatigut Pakistanimi ministeriunerusimasumik Benazir Bhutomik 2007-imi decembarimi inuartarinninnermut pisuusutut pasillerpaat.
