Talibanit akiorniarpai
Talibanit Pakistanimi pissaaneqaleraluttuinnarnerat akiorniarlugu, Pakistanimi ministeriunerusimasup Benazir Bhuttop nuleernerata Asif Ali Zardarip partiiminit præsidentissatut sassartinneqartup neriorsuutigaa.
Allattoq Mads Lynge
Tuluit tv-qarfissuanit BBC-mit apersorneqarluni, 55-inik ukiullip Zardarip oqaatigaa, Pakistani peqqarniisaarniartarnerit akiorniarneqarnerani ajorsalersoq.
Pakistanimi septembarip ulluisa arfernanni præsidentimut qinersisoqartussaavoq.
Aningaasanik peqquserluuteqarsimasutut Asif Ali Zardari unnerluutigineqarpoq, ukiorpassuarni taamatut pasillerneqartarsimalluni.
Zardari erninilu Bilawal Bhutto Zardari partiimut PPP-mut siulittaasutut decembarimi qinigaapput.