Talibanip sakkutuui ikiuiniartut
Illoqarfimmi Laskar Gahmi napparsimmavimmi nukappiaraq Abdul Hamid aqqaneq-marlunnik ukiulik nissumigut naamigullu aallaaneqarami qanoq pisoqarsimanera pillugu oqaluttuarpoq.
- Illutta silataaniitillunga allamiut sakkutuuinit aallaaneqarpunga, illutsinnut iseqqinniaraluarpunga saperlungali. Tamatuma kingorna timmisartoq takkuppoq qaartartumeerillunilu, inuillu eqqanniittut sulluliamut toqqorlutik.
Abdul Hamid aqqaneq-marlunnik ukiulik oqaluttuarpoq nammineq allallu 30-t ikilerneqartut aatsaat Røde Korsinut ingerlanneqarsimallutik, kingornalu taxanut ilaallutik Laskar Gahmi napparsimmavimmut ingerlatinneqarsimallutik, tamannali aatsaat pisimalluni NATO talibanillu sivisoqisumik isumaqatigiinniareersullu, kingornatigullu talibaninit, taakkua qaartartulersuutaasa akornisigut, biilit ingerlatinneqarsimallutik.
Tamakkua tassaapput sorsunnermi tusarneqajuitsut illuatungeriillu arlaannaannit tusarliunneqartartut. Oqaluttuarli taanna uninngasumit allamit uppernarsarneqarpoq.
Laskar Gahmi Italiamiut napparsimmaviat inunnik sakkutuujunngitsunik NATO-p Afghanistanimilu naalakkersuisut sakkutuuinit ikilerneqarsimasunik ulikkaarpoq, tamannali illuatungeriinnit uppernarsarneqarani.
Nakorsaq Italiamiu oqaluttuarpoq inuit sakkutuujunngitsut 40-t illoqarfimmit Mahrjameersut ikilerneqarsimasut sorsunnermiluunniit allatut ajoqusersimasut.
Sakkutuut iligiiaat Afghanistanimiut sakkutuui peqatigalugit Mahrjamik saassussisimasut oqarput, illoqarfimmi eqqissisimaneqartoq aammalu nunap ilaa annikitsoq kisimi tamakkiisumik nakkutigineqanngitsoq.
