Talibanimeersut arnaq toqumut pillarpaat
Talibanikkunnut ilaasortat ilaata arnaq allasiorsimasutut pasineqartoq toqumut pillarsimavaa. Illoqarfiit pingaarnersaanni Kabulimi, inuit tamat takusinnaasaannik, tamanna pivoq.
Toqumut pillaanermit videoliami, nutaarsiassaqartitsivimmit Reutersimit pissarsiarineqarsimasumi, takuneqarsinnaavoq, Afghanistanip qanittuani inatsisit islamimik upperisallit eqimattakkaat aamma aqukkaat.
Videoliami, minutsinik pingasunik sivisussusilimmi, takuneqarsinnaavoq angutip turbanillip arnaq aqqusinermi pujoralaqaqisumi seeqqumiartoq qanilliartoraa. Killerpiaanut periarluni tallimariarluni aallaavaa, nunaqarfinnguup, Parwanip provinsiani, angutit 150-it missaanniittunit qiimmattarlutik nilliasut isiginnaartuliullugit.
- Allahp allasioqqunneq ajorpaatigut, tamanna kukkunerummat. Arnamuna toqumut pillagaanissaa Allahp naalakkiutigigaa, angut alla, pinerluttunik toqutassanik toqutsisartup arnamut qanilliartornerani, oqarpoq.
Provinsimi guvernøri, Basir Salangi, oqarpoq, video nunaannarmi illoqarfimmi, Qimchokimi, Shinwarip pigisaaniittumi, Kabulimiillu nalunaaquttap-akunnera ataaseq biilerluni tikinneqarsinnaasumi, sapaatip-akunnera kingulleq assilineqartuusut.
