Talibanikkut Afghanistanimi saassusserujussuartut
Talibanimut ilaasortat sakkutuutut atisalersorlutik Afghanistanimi sakkutooqarfimmut saassussipput, Afghanistanimilu sakkutooqarfinnut saassussinerni aatsaat taama toqutaasoqartigaaq.
Nunap avannarpasissuani saassussipput, tassanilu sakkutuut 140-t toqutaallutik.
Nutaarsiassaqartitsiviit Reuters aamma dpa taama allaaserisaqarput.
Toqutaasut qanoq amerlatiginerat pillugit tusagassiuutit assiginngitsunik allaaserisaqaraluarput, sakkutuulli 140-t toqutaasimasut 160-illu ikiligaasimasut atorfilittap dpa-mut arfininngornermi ullaakkut uppernarsarpaa.
Taamaasillunilu Afghanistanimi sakkutooqarfinnut saassussinerni toqutaasut aatsaat taama amerlatigipput.
Talibanikkut sakkutooqarfimmut illoqarfimmi Mazar-i-Sharifimittumut tallimanngormat saassussipput.
Sakkutuutut atisalersorlutik sakkutuut biiliini pingasuni sakkutooqarfimmukarput. Sakkutooqarfiullu isaaffia raketimik igeriussiffigalugu saassussinertik aallartippaat.
Afghanistamini qaammatini kingullerni marlunni aappassaanik annertuumik saassussisoqarpoq
Kabulimi sakkutuut napparsimmaviannut marsimi saassussisoqarpoq. Tassani inuit 49-t toqutaapput 76-illu ikiligaallutik. Islamisk Stat Kabulimi saassussinermut akisussaasuunerarput.
/ritzau/