Talerperliuniaq Christchurchimi peqqarniisaarniarnerminut pineqaatissinneqangajalertoq
Australiamiup talerperliunianeersup Brenton Tarrantip pineqaatissinneqarnissaanut eqqartussineq New Zealandimi Christchurchimi ataasinngornermi aallartippoq, isumannaallisaaniarnerlu annertungaatsiarluni.
Muslimit Christchurchimi qinusarfiini marlunni 2019-imi marsip qaammataani peqqarniisaarniarluni inunnik 51-inik toqutsisimasutut amerlasuunillu ikiliisimasutut Australiamiu pisuutinneqareerpoq.
AAMMA ATUARUK Muslimit qinusarfiinut saassussisimasutut pasisaq pisuunerartoq
Saassussinini internetikkut toqqaannartumik aallakaatippaa. Anguniakkani quppernernut 74-inut allassimasani saassussinngitsiarnermini saqqummiussimavai, talerperliuniatullu tassani imminut taalluni.
Christchurchimi eqqartuussivik assersorneqarpoq politiillu sakkulersortut paarsillutik.
Eqqartuussivimmi sulisut tusagassiortullu eqqartuussivimmut isinnginnerminni politiinit qimmilisartunit misissorneqaqqaartarput.
Inuit saassussinermi aniguisut 66-it nalunaarutaat, Tarrantip eqqartuussivimmi ilaatigut tusassavai.
Australiamiup New Zealandimi siullersaalluni inuunermi sinnerani parnaarussaanissaa aalajangerneqarumaartoq, eqqartuussissuserisut ilimagaat, Tarrantilu misiliummik aamma iperagaasinnaassanngitsoq ilimagineqarluni.
29-nik ukiullip Brenton Tarrantip anguniakkani eqqartuussivimmi nammineq saqqummiutissagai amerlasuunit ernummatigineqarpoq.
AAMMA ATUARUK Angut 28-nik ukiulik muslimit qinusarfianni toqoraasimasutut pasineqartoq pinngitsuunerartoq
Tusagassiorfiit eqqartuussisumit Cameron Manderimit tamanna pillugu killilersuiffigineqarput, Tarrantimmi talerperliuniatut anguniagai siammarterneqartariaqanngitsut eqqartuussisup oqaatigaa.
Tusagassiorfiit eqqartuussivimmi saqqummiussat suut saqqummiussinnaaneraat Manderip ullut tamaasa aalajangertassavaa.
