Talerperliit Sverigimi ajugaaqqarput
Sverigimi ippassaq qinersisoqarmat, partiit talerperliunerusut ajugaapput. Qineqqusaartarnerni talerperliunerusut suleqatigiilluarsimanerat tusagassiuteqarfinnit maluginiarneqarsimavoq.
Partiini talerperliunerusuni qineqqusaartarnerni, suliffissanik amerlanerusunik pilersitsinissamik, suliffeqarfiillu pillugit politikki pitsaanerusoq neriorsuutigineqarsimavoq. Qinersisartunillu maannakkut tamanna ornigineqarnerulluni Sverigimi maannakkut statsministerinngortussanngorpoq, 41-nik ukiulik, Frederik Reinfeldt.
Ukiuni kingullerni 10-ini Sverigimi statsministeriusoq Socialdemokratineersoq Göran Persson, qinersinermi ajorsareerlunilu partiimi siulittaasutut tunuarumaarluni ippassaq unnukkut nalunaaruteqarpoq. Ukiuni kingullerni 100-ni qinersisoqartarnerani, aatsaat taamak Socialdemokratit angusarlutsigipput.
Partiit saamerliunerusut qinersinermi 46,2 procentinik taaneqarsimasut, partiit talerperliunerusut 48,1 procentinit taaneqarsimapput. Riksdagen-imi inissat 178-it partiinit talerperliunerusunit pissarsiarineqartut, Socialdemokratinit inissat 171-it pissarsiaraat.
